Թուրքիայի ճանապարհներից մեկում կրկին մարդկային ոսկորներ են հայտնաբերվել

ԵՐԵՎԱՆ, 25 ՄԱՐՏԻ, ԱՐՄԵՆՊՐԵՍ: Թուրքիայի Քըրըքքալե նահանգում երկարատև անձրևների հետևանքով Քեսքին գավառի ճանապարհահատվածում առաջացած հողի սողանքից հետո տարածքում սկսել են մարդկային ոսկորներ և գանգեր երևալ: Ինչպես հաղորդում է«Արմենպրես»-ը` վկայակոչելով թուրքական Radikal պարբերականը, տեսնելով մարդկային ոսկորները` տեղի բնակիչներն ահազանգել են տեղական իշխանություններին:

Անմիջապես դեպքի վայր են ժամանել ոստիկանության աշախատակիցները: Հանրապետական դատախազության կարգադրությամբ` ճանապարհահատվածում սկսվել են պեղումներ կատարվել, որի արդյունքում հայտնաբերված ոսկորներն ու գանգերը տարվել են ուսումնասիրության:

Նույն շրջանում մարդկային ոսկորներ էին հայտնաբերվել նաև 2012 թվականին: Հաղորդվում է, որ այս տարածքներում նախկինում զորանոցներ և ռազմական կայաններ են եղել: