Թուրք լրագրողը դատարանում կրկնել է Հայոց ցեղասպանության իրողության եւ Դինքի սպանության մեջ թուրքական պետության մեղավորության պնդումները

ԵՐԵՎԱՆ, 20 ՓԵՏՐՎԱՐԻ, ԱՐՄԵՆՊՐԵՍ: Թուրք լրագրող Թեմել Դեմիրելը, ով Ստամբուլի «Ակոս» թերթի հայազգի խմբագրապետ Հրանտ Դինքի դեմ մահափորձի հաջորդ օրը հայտարարել էր, որ «Հրանտ Դինքը սպանվել է հայ լինելու եւ Հայոց ցեղասպանության իրողության մասին խոսելու համար», դատարանում շարունակել է պնդել նույն ծոսքերը: «Ես հիմա էլ նույն «հանցագործությունն» եմ գործում. Դինքի մարդասպանը պետությունն է: Թող կրկին իմ դեմ հայց ներկայացնեն: Այսօր բոլորն էլ գիտեն Հայոց ցեղասպանության իրողության մասին», - ասել է նա:

Ինչպես հաղորդում է «Արմենպրես»-ը` վկայակոչելով թուրքական bianet.org անկախ լրատվական կայքը, Թեմել Դեմիրելը Թուրքիայում մեղադրվում է այդ երկրի Քրեական օրենսգրքի` «թրքականությունը վիրավորելու» տխրահռչակ 301-րդ հոդվածով: Անկարայի 2-րդ առաջին ատյանի քրեական գործերի դատարանում, որտեղ տեղի է ունեցել լրագրողի նկատմամբ հերթական դատալսումը, նրա փաստաբան Լեւենթ Քանաթը դատարանից պահանջել է արդարացման վճիռ կայացնել լրագրողի նկատմամբ` հիմնավորելով, որ նրա հայտարարությունները խոսքի ազատության սահմաններում են: Դատարանը որոշել է հետաձգել լրագրողի նկատմամբ հետաքննությունը եւ դատական գործընթացը: