2 րոպեի ընթերցում
ԵՐԵՎԱՆ, 19 ՀՈՒՆՎԱՐ, ԱՐՄԵՆՊՐԵՍ: «Ակոս» պարբերականի նախկին գլխավոր խմբագիր Հրանտ Դինքի մահվան 6-րդ տարելիցի կապակցությամբ պոլսահայ լրագրողի հիշատակի ոգեկոչման արարողություն է տեղի ունեցել Դիարբեքիրում: Ինչպես հաղորդում է«Արմենպրես»-ը` վկայակոչելով թուրքական HaberTurk-ը, Դինքի հիշատակի կապակցությամբ կազմակերպված արարողությանը ներկա են գտնվել «Մարդու իրավունքների պաշտպանության» Դիարբեքիրի մասնաճյուղի նախագահ Ռաիջի Բիլիջին և մեծ թվով սովորական քաղաքացիներ:
«Մեզ ասացին, որ Հրանտի մարդասպանները կազմակերպված խմբավորման անդամներ չեն, և մարդասպաններին մեր մեջ խցկեցին: Վեց տարի է, ինչ Հրանտը սպանվեց և վեց տարի է` մեր մեջ ցավը չմեղմացավ: Մեր երկրի համար արդեն ամոթալի դարձած այս հանցագործությունը դեռևս չի բացահայտվել»,-հայտարարել է Բիլիջին: Նա նշել է, որ կցանկանար ասել, որ Դինքի մահից հետո փոխվել են այն բաները, հանուն որոնց նա պայքարում էր, սակայն դա այդպես չէ: «Դեռ աղավնիները սպանվում են, դեռ արյուն է թափվում: Չնայած շատ ժամանակ է անցել, դեռևս ի հայտ չեն եկել թաքնված մութ ուժերը: Արդեն ողջ երկիրն է տեղյակ կեղտոտ ձեռքերի առկայության մասին: Մենք` մարդու իրավունքների պաշտպաններս, ցանկանում ենք, որպեսզի դատապարտվեն Հրանտին և մյուս կորուսյալներին սպանողները»,-ասել է նա` հավելելով, որ իրենք հավասար պետություն ստեղծել ցանկացողների հետ մեկտեղ կարոտում են Հրանտ Դինքին:
2007 թվականի հունվարի 19-ին Ստամբուլի Շիշլի թաղամասում գտնվող «Ակոս»-ի խմբագրատան առաջ նա սպանվեց թուրք դավադրի ձեռքով` հետևից գլխին արձակված հրազենային երեք կրակոցներից: Հեռանալուց հետո մարդասպանը գոչել էր` «գյավուր»` հիմք տալով մտածելու, որ սպանությունը կատարվել է ազգայնական հողի վրա: