Սերժ Թանկյանն ու Արտո Թունջբոյաջյանն ԱՄՆ-ում սիրիահայերին աջակցության համերգի են մասնակցել

ԵՐԵՎԱՆ, 15 ՆՈՅԵՄԲԵՐԻ, ԱՐՄԵՆՊՐԵՍ: «Հայ Էյդ» խորագրով համերգը, որի կարգախոսն էր «Մեկ սիրտ, մեկ ոգի. Միանանք եւ օգնենք», տեղի է ունեցել ԱՄՆ-ի Փասադենայի «Սիվիք Օուդիթորիում»-ում: Ինչպես փոխանցում է «Արմենպրես»-ը` վկայակոչելով Asbarez-ը, համերգը կազմակերպել էին Սիրիահայության օգնության միացյալ մարմինը եւ «Արվեստագետները երեխաների համար» կազմակերպությունը:Սիրիայի հայ համայնքին օգնելու նպատակով կազմակերպված համերգին մասնակցելու համար Փասադենայի «Սիվիք Օուդիթորիում»-ում հավաքվել են հայ երգիչներ եւ երաժիշտներ ոչ միայն Միացյալ Նահանգներից, այլ նաեւ Հայաստանից եւ Ֆրանսիայից:Սերժ եւ Խաչատուր Թանկյանները, Արտո Թունջբոյաջյանը, Ռուբեն Հախվերդյանը,Լիլիթ Պիպոյանը, Վիգեն Դարբինյանը, Սեպուհ Սիմոնյանը, Արմեն Մովսիսյանը, ինչպես նաեւ «Էլեմենտ», «Վիզա», «Դրթի Դայմնդ» խմբերը եւ «Հայ եմ» քառյակը իրենց ջերմ կատարումներով աջակցություն են ցուցաբերել Սիրիայի հայ համայնքին:

Սիրիայի իրենց հայրենակիցներին նաեւ նվերներ են ուղարկել Ռոզ եւ Ալեք Փիլիպոս, Սրբոց Նահատակաց Ֆերահյան, Վահան եւ Անուշ Շամլյան ազգային հայկական վարժարանների սաները: Համերգի ընթացքում հայտարարվել է, որ առաջիկա շաբաթների ընթացքում Սիրիահայության օգնության մարմինը Սիրիայի հայ համայնքին կփոխանցի 250 հազար ԱՄՆ դոլար:

Սիրիահայության օգնության միացյալ մարմինը ստեղծվել է սիրիահայերին օժանդակելու նպատակով՝ Արեւմտյան Ամերիկայում գործող եկեղեցական, բարեսիրական եւ կուսակցական կազմակերպությունների միասնական որոշումով 2012 թ-ի օգոստոսի 4-ին: