Ամերիկահայ երաժիշտ Սերժ Թանկյանը հիշեցրել է Հայոց ցեղասպանության մասին ու անդրադարձել ադրբեջանական ագրեսիային
1 րոպեի ընթերցում
![Ամերիկահայ երաժիշտ Սերժ Թանկյանը հիշեցրել է Հայոց ցեղասպանության մասին ու անդրադարձել ադրբեջանական ագրեսիային](http://armenpress.am/resized/480/static/news/b/2023/04/1109436.jpg)
ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: «Ազգային ցավը մնում է մեր հավաքական հիշողության մեջ»: «Արմենպրես»-ի հաղորդմամբ՝ «Ինստագրամ»-ի իր էջում ամերիկահայ երաժիշտ, SOAD-ի հայտնի անդամ Սերժ Թանկյանը հիշեցրել է Հայոց ցեղասպանության մասին ու անդրադարձել ադրբեջանական ագրեսիային:
«Գիտակցումն ու գենետիկ ցավը մնում է մեր հավաքական հիշողության «առաջնագծում»: Այն շարունակաբար մեզ հիշեցնում է ամուր կապված միասնականության մասին, որը մենք պետք է կիրառենք, որպեսզի հասնենք ազգային բարգավաճման»,- գրված է նրա «Ինստագրամ»-ի stories բաժնում:
Թանկյանն անդրադարձել է նաև ապրիլի 23-ին՝ Սոթքի հատվածում տեղակայված հայկական դիրքում հակառակորդի կրակոցի հետևանքով հայ զինծառայողի մահվան և Արցախում՝ Հակարի գետի կամրջի մոտ ադրբեջանական կողմի անցակետ տեղադրելու լուրերին:
«Ադրբեջանը տեռորիստ պետություն է»,«Ադրբեջանը շարունակում է կիրառել հայերի հանդեպ իր անօրինական շրջափակումը՝ տեղադրելով անցակետ»,-գրել է Թանկյանը: