1 րոպեի ընթերցում
ԵՐԵՎԱՆ, 10 ՆՈՅԵՄԲԵՐԻ, ԱՐՄԵՆՊՐԵՍ: Թուրքիան մոտ ժամանակներում Սիրիայի հարցում միանձնյա չի գնա անմիջական ռազմական գործողությունների: Նոյեմբերի 10-ին լրագրողների հետ հանդիպմանը նման տեսակետ հայտնեց թուրքագետ Անուշ Հովհաննիսյանը: «Նման գործողություններն էլ ավելի կսրեն առանց այդ էլ քրդական լարված խնդիրը»,- «Արմենպրես»-ի փոխանցմամբ՝ ընդդծեց թուրքագետը: Հովհաննիսյանի խոսքով վերջին շրջանում Սիրիայի քրդերը սկսել են ստեղծել իրենց ռազմական ջոկատները, ինչը կարող է լուրջ գործոն դառնալ թուրք-սիրիական հարաբերություններում: «Եթե քրդերը դաշնակցեն Ասադի զորքերի հետ, դա կփոխի ուժերի դասավորությունը»,- ասաց Հովհաննիսյանը` ավելացնելով, որ Սիրիայի և Թուրքիայի քրդերը կարող են միավորվել թուրքական պետության կողմից հակասիրիական լուրջ ագրեսիայի դեպքում:
Թուրքիայի կողմից անմիջական ռազմական գործողություններ չսկսելու մյուս գործոնն այդ երկրում առկա հակապատերազմական լուրջ տրամադրություններն են ժողովրդի ու իշխանության շրջանում:
Անդրադառնալով Սիրիայի հայ համայնքին` թուրքագետը նշեց, որ համայնքը պատերազմի պատճառով անդառնալի կորուստներ է կրել, եւ այժմ առաջնայինը սիրիահայության ֆիզիկական գոյության խնդիրն է: