2 րոպեի ընթերցում
ԵՐԵՎԱՆ, 1 ՍԵՊՏԵՄԲԵՐԻ, ԱՐՄԵՆՊՐԵՍ: Ադրբեջանցի մարդասպան ահաբեկչին պաշտոնական Բաքվին հանձնելու Հունգարիայի իշխանությունների ստոր քայլն արժանի է ամենայն պարսավանքի և արգահատանքի: Իրեն եվրոպական արժեքներին, մարդու իրավունքների պաշտպանությանը հավատարիմ համարող այս պետությունը մարդասպանին ազատություն շնորհեց՝ այս կերպ մարտահրավեր նետելով ողջ քաղաքակիրթ աշխարհին: Ինչպես հաղորդում է «Արմենպրես»- ն, այս մասին նշվում է ՍԴՀԿ Հայաստանի վարչության հայտարարությունում: Հնչակյանները ողջունում են Հայաստանի իշխանությունների՝ Հունգարիայի հետ դիվանագիտական հարաբերությունների կասեցման որոշումը, ինչպես նաև հույս հայտնում, որ այսքանով գործընթացը չի ավարտվի, իսկ Սաֆարովը կստանա իր արժանի պատիժը՝ լինի նա Բուդապեշտի բանտում, թե Բաքվի իր տանը: «Ադրբեջանական իշխանությունների՝ մարդասպանին իբրև հերոս ընդունելու և մեծարելու փաստն էլ ցույց է տալիս, թե ինչ ֆաշիստական, հայատյաց ու մարդատյաց մթնոլորտ է տիրում մեր հարևան երկրում»:
ՍԴՀԿ-ն վստահ է, որ Սփյուռքի կազմակերպական կառույցներն իրենց ողջ ուժով և կարողությամբ կսկսեն պայքարը, որպեսզի ողջ աշխարհն արժանի գնահատական տա Հունգարիայի ուխտադրուժ, իսկ Ադրբեջանի էլ ֆաշիստական քաղաքականությանը: «Հատուցման պահը մոտ է»,- հիշեցնում են հայկական ամենահին կուսակցությունից: