«Վարդանանց ասպետներ» կազմակերպության «Տարվա մարդ» կոչումին արժանացել է 2 թուրք մտավորական

ԵՐԵՎԱՆ, 19 ՀՈՒԼԻՍԻ, ԱՐՄԵՆՊՐԵՍ: Նյու Յորքում գործող հայկական «Վարդանանց ասպետներ» կազմակերպությունը «Տարվա մարդ» է հռչակել հայտնի թուրք մտավորական և «Բելգե» հրատարակչատան սեփականատեր Ռագըփ Զարաքոլուին և ամերիկաբնակ թուրք պատմաբան Թաներ Աքչամին: Այս մասին հաղորդում է «Արմենպրես»-ը` վկայակոչելով Թուրքիայում լույս տեսնող հայկական «Մարմարա» պարբերականը:

Զարաքոլուի փոխարեն հանդիսությանը ներկա է եղել նրա որդին, ով ներկաներին է ընթերցել հոր ուղերձը: Ուղերձում թուրք մտավորականն իր ափսոսանքն է հայտնել հանդիսությանը ներկա գտնվել չկարողանալու համար ևնշել, որ իր համար մեծ պատիվ է «Տարվա մարդու» կոչումը կիսել Թաներ Աքչամի հետ: Նա ընդգծել է, որ մեր օրերում էլ շարունակվում է 1915 թվականի Հայոց ցեղասպանության ուրացման քաղաքականությունը: Զարաքոլուն նաեւ ցավով արձանագրել է այն փաստը, որ կոտորածի հեղինակներն ու տուժողները տեղերով փոխվում են` «ոճրագործը հռչակվում է անմեղ, ամբաստանյալը բազմում է դատախազի աթոռին»:

Թուրք մտավորականը նշել է նաև, որ պատրաստում է գիրք հրատարակել «20-րդ դարի վերջի Հայկական տաբուն. Տերնոն-Զարաքոլու դատավարությունը» վերնագրով: Նա ցավ է հայտնել այն փաստի կապակցությամբ, որ չնայած Անատոլիայում գործող համալսարանների բավական խիտ ցանցին` չկա ցեղասպանության ուսումնասիրման գոնե մեկ ինստիտուտ: Որպես ուղերձի վերջաբան` Զարաքոլուն նշել է, որ ինքը շարունակելու է ճշմարտության հայտնաբերման այս երկար քայլարշավը:

Նյու Յորքի «Վարդանանց ասպետներ» կազմակերպությունը, մինչ օրս շարունակելով իր գործունեությունը, դպրոցներ է հիմնում Հայաստանի աղքատ գյուղերում: Կազմակերպությունը մեծ թվով մասնաճյուղեր ունի նաև ԱՄՆ-ում: