Ռուս ռեժիսորն իր փորձը փոխանցեց հայ ապագա ռեժիսորներին

ԵՐԵՎԱՆ, 9 ՀՈՒԼԻՍԻ, ԱՐՄԵՆՊՐԵՍ: Կինոն կառուցվում է լեզվի նման. երկու կադրը միավորվում է այնպես, ինչպես երկու բառերը: «Արմենպրես»-ի փոխանցմամբ` հուլիսի 9-ին ապագա ռեժիսորների հետ հանդիպմանն այդ մասին նշեց ռուս հայտնի ռեժիսոր Մարինա Ռազբեշկինան: Նա հայտնի վավերագրող է` թեեւ չի ստացել համապատասխան մասնագիտական կրթություն եւ իր առաջին ֆիլմը նկարահանել է 40 տարեկանում: «Այնպես զարմացաք, կարծես մարդիկ այդքան չեն ապրում»,- կատակեց նա:

Ռեժիսորն ապագա վավերագրողներին խորհուրդ տվեց վարակվել ֆիլմ նկարահանելու «մոլուցքով»` միաժամանակ նկատելով որ վավերագրական ֆիլմեր հեռուստատեսությամբ քիչ են ցուցադրվում: Նա երիտասարդներին խորհուրդ տվեց երբեք ինքնագոհությամբ չվարակվել. «Երբ ամեն ինչ շատ լավ է, եւ դուք սկսել եք բոլորին դուր գալ, ուրեմն այդտեղ մի բան այն չէ»,- ասաց Ռազբեշկինան: Ռեժիսորը նշեց, որ վավերագրողի համար ամենից կարեւորն այն է, որ նա ապրում է իր կյանքը, բայց միաժամանակ կարողանում է ինքն իրեն հետեւել կողքից: Նա խորհուրդ տվեց ուսանողներին քիչ օգտվել դասագրքերից, քանի որ դրանք ռեժիսորի մտածելակերպը միակողմանի են դարձնում:

Հուլիսի 9-ին վարպետության դաս ունեցավ նաեւ աշխարհահռչակ ռեժիսոր Վիկտոր Էրիսեն: