3 րոպեի ընթերցում
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի գործարարների համար հոկտեմբերից նոյեմբեր ընկած ժամանակահատվածում կանցկացվեն վերապատրաստման դասընթացներ: Դրանք իրականացվում են Եվրոպական միության կողմից ֆինանսավորվող Արեւելյան ներդրումներ (East Invest) ծրագրի շրջանակներում: Դասընթացներն ուղղված են Արեւելյան գործընկերության երկրների փոքր եւ միջին ձեռնարկությունների զարգացմանը: Ինչպես «Արմենպրես»-ին տեղեկացրեց ՀՀ առեւտրաարդյունաբերական պալատի լրատվական ծառայության ղեկավար Վրեժ Դարուխանյանը, դասընթացներին կմասնակցեն այն ձեռնարկությունները, որոնք արտահանման ոլորտում ունեն մեծ ներուժ եւ լայն հեռանկար: Նրա խոսքով' մասնակից ընկերությունները հնարավորություն կունենան ուսումնասիրելու միջազգային շուկայի լավագույն փորձը:
Արեւելյան գործընկերության վեց երկրներից յուրաքանչյուրում' Հայաստանում, Վրաստանում, Ադրբեջանում, Ուկրաինայում, Մոլդովայում, Բելառուսում կկազմակերպվեն նախնական եւ բարձր մակարդակի ուսումնական դասընթացներ:
Նախնական մակարդակը նախատեսված կլինի փոքր եւ միջին ձեռնարկատերերի համար, ովքեր ԵՄ երկրների հետ աշխատելու իրենց ունեցած փորձով զիջում են, ԵՄ-ի չափանիշների, օրենսդրության եւ իրավական դաշտի, միջազգայնացման ոլորտում ունեն սահմանափակ գիտելիքներ:
Բարձր մակարդակը նախատեսված է այն գործարարների համար, ովքեր լավ են տեղեկացված եւ սերտ կապեր ունեն ԵՄ ընկերությունների հետ: Դասընթացները կանցկացնեն ԵՄ-ից ժամանած փորձագետները: Առավել ակտիվ մասնակիցներին հետագայում հնարավորություն կտրվի անվճար մասնակցել ԵՄ երկրներում կազմակերպվող' համապատասխան ոլորտները ներկայացնող խոշոր ցուցահանդեսներին, ինչպես նաեւ հանդիպել իրենց եվրոպական գործընկերներին:
Վ. Դարուխանյանը նշեց, որ գործարարների մասնակցությունն անվճար է, եւ ցանկացողները կարող են դիմել ՀՀ առեւտրաարդյունաբերական պալատ մինչեւ սեպտեմբերի 30-ը:
Արեւելյան ներդրումներ (East Invest) ծրագիրն ուղղված է նպաստելու Արեւելյան գործընկերության երկրների տնտեսական զարգացմանը' միեւնույն ժամանակ խթանելով տարածաշրջանային համագործակցությունը: Ծրագիրը Եվրոպական հանձնաժողովի նախաձեռնությունն է, ֆինանսավորվում է Եվրոպական միության կողմից եւ իրականացվում Եվրապալատի կողմից: Հայաստանում ծրագրի իրականացնողը ՀՀ առեւտրաարդյունաբերական պալատն է: