2 րոպեի ընթերցում
Լեհաստանի ներքին անվտանգության գործակալությունը ձերբակալել է երեք դեռահասի, որոնք կասկածվում են ահաբեկչություն նախապատրաստելու մեջ։ «Արմենպրես»-ի փոխանցմամբ, այս մասին X-ի իր էջում հայտնել է Լեհաստանի հատուկ ծառայությունները համակարգող նախարար Տոմաշ Սեմոնյակը։
Նրա խոսքով՝ կասկածյալները մեկ 16-ամյա և երկու 17-ամյա պատանիներ են, որոնք կապեր են ունեցել նեոնացիստական միջազգային շարժման հետ։
Քննիչները հատկապես կարևորել են երկու 17-ամյա պատանիների վերաբերյալ ձեռք բերված տվյալները։ Իրավապահ մարմինների տեղեկություններով՝ նրանք հաղորդագրությունների փոխանակման առցանց հավելվածներով քննարկել են ինքնաշեն պայթուցիկ նյութերի, ինքնաշեն հրազենի և պիրոտեխնիկական նյութերի մասին տեղեկություններ, որոնք նախատեսված էին ահաբեկչական հարձակման համար։
Կասկածյալներից մեկի օգտագործած տարածքում խուզարկության ժամանակ հայտնաբերվել են քիմիական նյութեր, որոնք կարող էին օգտագործվել պայթուցիկ նյութեր պատրաստելու համար։
Դատարանը որոշում է կայացրել երկու 17-ամյա պատանիներին նախնական կալանքի տակ պահելու, իսկ 16-ամյա պատանուն՝ անչափահասների հատուկ հաստատություն ուղարկելու մասին։
Ձերբակալությունները հաջորդել են նոյեմբերի սկզբին Կրակովի գլխավոր հրապարակում տեղի ունեցած զինված հարձակմանը, որի հետևանքով վեց մարդ էր զոհվել։
Գդանսկի շրջանային դատախազության հայտարարության համաձայն՝ հետաքննությունը շարունակվում է։ Դատախազները փորձում են պարզել խմբի գործունեության մեջ ներգրավված այլ անձանց ինքնությունը և պարզել ծրագրված հանցագործությունների ամբողջ ծավալը։