1 րոպեի ընթերցում
ՀՀ տարածքային կառավարման և ենթակառուցվածքների նախարար Դավիթ Խուդաթյանը նոյեմբերի 10-ին այցելել է Արմավիրի մարզ՝ ծանոթանալու մարզում իրականացվող ճանապարհաշինական աշխատանքների ընթացքին։
«Արմենպրես»-ի հաղորդմամբ՝ նախարարությունից հայտնում են, որ Խուդաթյանը մարզպետ Վահրամ Խաչատրյանի և Ճանապարհային դեպարտամենտի պատասխանատուների հետ շրջել է մի շարք շինհրապարակներում։
Առաջին կանգառը Վանանդ բնակավայրի 11 կմ երկարությամբ ճանապարհահատվածում է եղել, որտեղ ընթանում են ասֆալտապատման ինտենսիվ աշխատանքներ։
Այնուհետև նախարարը եղել է Արմավիր-Մայիսյան ճանապարհահատվածում, որտեղ ասֆալտապատման աշխատանքներն արդեն ավարտվել են։
Դավիթ Խուդաթյանն այցելել է նաև Մեծամոր համայնքի Արտաշար բնակավայրի 3,4 կմ երկարությամբ ճանապարհահատված, որտեղ ևս ընթանում են ասֆալտապատման աշխատանքներ։ Ծրագիրը նախատեսվում է ավարտել այս տարի։
Նախարարն այցելել է նաև Էջմիածին-Շահումյան ճանապարհահատված, որտեղ հիմնանորոգման աշխատանքներն ավարտական փուլում են։
Շինհրապարակներում Դավիթ Խուդաթյանը պատասխանատուներին մի շարք հանձնարարականներ է տվել՝ ընդգծելով աշխատանքների որակի ապահովման և սահմանված ժամկետների պահպանման անհրաժեշտությունը։