Նոր Սահմանադրության ընդունմամբ որևէ մեկը չի չեղարկում Անկախության հռչակագիրը․ Արթուր Հովհաննիսյան
1 րոպեի ընթերցում
Հայաստանի Ազգային ժողովի «Քաղաքացիական պայմանագիր» խմբակցության պատգամավոր Արթուր Հովհաննիսյանն այն կարծիքին է, որ նոր Սահմանադրության ընդունմամբ որևէ մեկը չի չեղարկելու Անկախության հռչակագիրը։ «Արմենպրես»-ի հաղորդմամբ՝ այս մասին խորհրդարանական մեծամասնություն ունեցող քաղաքական ուժի ներկայացուցիչը հայտարարել է Ազգային ժողովի քառօրյա նիստերն ամփոփող ճեպազրույցում։
«Ես ևս մեկ անգամ պնդում եմ, որ Սահմանադրության թեման Հայաստանի Հանրապետության ներքին օրակարգն է։ Այժմյան Հայաստանը պետք է ունենա 2026 թվականի դրությամբ մեր երկրի նպատակները և պահանջներն արտահայտող Սահմանադրություն։ Նոր Սահմանադրության ընդունմամբ որևէ մեկը չի չեղարկում Անկախության հռչակագիրը։ Այս հռչակագիրը կա և լինելու է հավերժ, դրա շնորհիվ Հայաստանն անկախացել է Խորհրդային Միությունից։ Այս փաստը որևէ մեկը չի վիճարկում»,-ասել է Արթուր Հովհաննիսյանը։
Ավելի վաղ Հայաստանի վարչապետ Նիկոլ Փաշինյանն Ազգային ժողովի մշտական հանձնաժողովների համատեղ նիստում «Հայաստանի Հանրապետության 2027թ. պետական բյուջեի մասին» օրենքի նախագծի քննարկման ընթացքում հայտարարել էր, որ կառավարությունը նոյեմբերին ծրագրում է հրապարակել նոր Սահմանադրության նախագիծը: