Ընթացիկ տարում Մոլդովայի համալսարաններ է ընդունվել 31 երկրից ավելի քան 2400 ուսանող. Moldpres
2 րոպեի ընթերցում
Հոդվածը հրապարակվում է «Արմենպրես»-ի և Moldpres-ի միջև ստորագրված համաձայնագրի շրջանակում։
Մոլդովայի Հանրապետության բարձրագույն ուսումնական հաստատություններն ընթացիկ ուսումնական տարում ընդունել են 2433 օտարերկրյա ուսանողի, ինչը 122-ով ավելի է 2025 թվականի ցուցանիշից։ «Արմենպրես»-ի փոխանցմամբ՝ այս մասին հաղորդում է Moldpres գործակալությունը։
Կրթության և հետազոտությունների նախարարության տվյալներով՝ այս տարի ընդունված ուսանողներից 1469-ն ընդգրկվել են բակալավրիատի, իսկ 964-ը՝ մագիստրատուրայի կրթական ծրագրերում: Երիտասարդները ժամանել են 31 երկրից, որոնց թվում են հիմնականում Ռումինիան, Ուկրաինան, Հնդկաստանը և Իսրայելը: Երկրի տարբեր համալսարաններում սովորում են նաև ուսանողներ Թունիսից, Միացյալ Նահանգներից, Չինաստանից, Շվեդիայից, Թուրքիայից, Դանիայից և Ադրբեջանից:
Օտարերկրյա ուսանողներից շատերն ընտրել են Մոլդովայի ազատ միջազգային համալսարանը, Իոն Կրեանգեի անվան պետական մանկավարժական համալսարանը, Մոլդովայի տեխնիկական համալսարանը, Նիկոլաե Տեստեմիցանուի անվան բժշկության և դեղագիտության պետական համալսարանը և Մոլդովայի պետական համալսարանը:
Ամենապահանջված ուսումնական ուղղությունների թվում են հոգեբանությունը, իրավագիտությունը, բժշկությունը, նախադպրոցական կրթությունը և ստոմատոլոգիան:
Նախարարության տվյալներով՝ վերջին հինգ տարվա ընթացքում համալսարանական ենթակառուցվածքներում ներդրվել է ավելի քան 600 միլիոն լեյ: Միաժամանակ Համաշխարհային բանկի աջակցությամբ «Բարձրագույն կրթությունը Մոլդովայում» նախագծի շրջանակներում մոտ մեկ միլիոն եվրո է հատկացվել ուսումնական գործընթացի միջազգայնացմանը նպաստելու համար:
Այդ միջոցներն ուղղվել են ուսումնական ծրագրերի արդիականացմանն ու միջազգային հավատարմագրմանը, դասախոսների՝ անգլերենով դասավանդելու կարողությունների զարգացմանը, studyin.md հարթակի ստեղծմանը, ինչպես նաև Մոլդովայի Հանրապետությունում ուսումնառության հնարավորությունների խթանմանը։