Ռուսաստանը Եգիպտոսի հետ քննարկել է այնտեղ անօդաչու ավիահամակարգերի արտադրություն հիմնելու հարցը

Անօդաչու ավիահամակարգերի ռուսաստանցի արտադրողները կարող են արտադրություններ հիմնել աֆրիկյան երկրների տարածքում. մասնավորապես, դա վերաբերում է երկրաբանական հետախուզության համար տեխնոլոգիաներին։ Ինչպես «Արմենպրես»-ը տեղեկանում է «Ինտերֆաքս» գործակալությունից, այդ մասին հայտարարել է ՌԴ  արդյունաբերության և առևտրի նախարար Անտոն Ալիխանովը «Ռուսաստան-Աֆրիկա» համաժողովի նստաշրջանում` նվիրված արդյունաբերական երկխոսությանը։

«Մենք առաջարկում ենք ոչ թե պարզապես այդ սարքավորումների մատակարարում։ Դրա հետ մեկտեղ առաջարկում ենք ամբողջական սպասարկում և աֆրիկյան պետությունների մասնագետների ուսուցում, որպեսզի նրանք հմտություններ ձեռք բերեն և հետագայում կարողանան շարունակել աշխատել ինքնուրույն։ Նաև երեկ, մասնավորապես, Եգիպտոսի գործընկերների հետ մենք համապատասխան առաջարկություններ ենք փոխանակել, մենք պատրաստ ենք այդ անօդաչու ավիահամակարգերի արտադրություններ տեղակայել աֆրիկյան պետությունների տարածքում», -ասել է նախարարը։

Որպես օրինակ նա բերել է «Գեոսկան» ընկերության տեխնոլոգիաները, որոնք ներկայացվել են համաժողովի շրջանակում կազմակերպված ցուցահանդեսում։ Նա նշել է, որ այս ընկերության անօդաչու ավիահամակարգերն արդեն իրենց դրսևորել են Անգոլայի, Բուրկինա Ֆասոյի, Զիմբաբվեի, Տանզանիայի, Հարավաֆրիկյան Հանրապետության և մի շարք այլ երկրների շուկաներում։