Զելենսկին հայտարարել է, որ ԱՄՆ-ի կողմից հետախուզական տվյալների փոխանցումն «այժմ աշխատում է»

Ուկրաինայի նախագահ Վոլոդիմիր Զելենսկին Օսլոյում կայացած մամուլի ասուլիսում հայտարարել է, որ Կիևը Վաշինգտոնից կրկին ժամանակին ստանում է հետախուզական տվյալներ ռուսական բալիստիկ հրթիռների արձակման մասին։ «Արմենպրես»-ի փոխանցմամբ՝ այս մասին հաղորդում է BBC-ն։

Նա շեշտել է, որ վաղ նախազգուշացման համակարգերը կարևոր են ուկրաինացի ժողովրդի համար, և շնորհակալություն է հայտնել ամերիկյան կողմին։

«Եթե խոսենք վաղ նախազգուշացումների մասին, դրանք շատ կարևոր են մեր ժողովրդի, մեր երեխաների և մեծահասակների, խաղաղ բնակիչների համար, որովհետև մենք լսում ենք, երբ բալիստիկ հրթիռներ են թռչում։ Մենք շնորհակալ ենք ամերիկյան կողմին։ Այժմ այն աշխատում է։ Ամեն ինչ հիանալի է», - հայտարարել է Ուկրաինայի նախագահը։

Ավելի վաղ Զելենսկին ասել էր, որ ԱՄՆ-ն մի քանի անգամ տեղեկություններ չի տրամադրել հրթիռակոծությունների մասին, սակայն ամերիկյան իշխանությունները պնդում էին, որ հետախուզական տվյալների փոխանակումն ընթանում է սովորական ռեժիմով։ Հոկտեմբերի 20-ին ավելի վաղ այդ թեման Զելենսկին քննարկել էր ԱՄՆ պետքարտուղար Մարկո Ռուբիոյի հետ։

Զելենսկին Օսլոյում մամուլի ասուլիսում նաև հույս է հայտնել, որ արբանյակային ինտերնետի բնականոն աշխատանքը կվերականգնվի «48 ժամվա ընթացքում»։ Մինչ այդ ուկրաինացի զինվորականները հայտարարել էին, որ շարժվող սարքերի վրա տեղադրված Starlink տերմինալները դադարում են աշխատել, երբ դրանց շարժման արագությունը գերազանցում է 160 կմ/ժամը։ Սա խոչընդոտում է ուկրաինական անօդաչու թռչող սարքերի և ուղղաթիռների աշխատանքին, այդ թվում՝ ռուսական հարվածային ԱԹՍ-ները որսացող սարքավորումների աշխատանքին։

Հոկտեմբերի 20-ին Օսլոյում Զելենսկին հանդիպել էր ԱՄՆ նախագահի հատուկ ներկայացուցիչ Սթիվեն Ուիթքոֆի, Նորվեգիայի վարչապետ Յոնաս Գար Ստյորեի և Ֆինլանդիայի նախագահ Ալեքսանդր Ստուբի հետ։ Թրամփի խորհրդական և փեսա Ջարեդ Քուշները բանակցություններին միացել էր տեսակապի միջոցով։ Ուկրաինական կողմը նոր առաջարկներ է ներկայացրել, որոնք Ուիթքոֆը հոկտեմբերի 21-ին պետք է փոխանցի Ռուսաստանի իշխանություններին Սանկտ Պետերբուրգ այցի ժամանակ։