2 րոպեի ընթերցում
Եվրոպական հանձնաժողովն ուժեղացրել է Ռուսաստանի վրա գործադրվող ճնշումը՝ պահանջելով ամբողջական տեղեկատվություն Սիբիրում ժանտախտի դեպքի վերաբերյալ, ինչպես նաև սատարելով թափանցիկության վերաբերյալ ԱՄՆ-ի ու Առողջապահության համաշխարհային կազմակերպության կոչերին։ Այդ մասին տեղեկացնում է «Արմենպրես»-ը՝ վկայակոչելով Euronews-ը։
«Շաբաթվա ընթացքում արդեն երրորդ անգամ կոչ ենք անում Ռուսաստանին՝ հնարավորինս շուտ տեղեկատվություն տրամադրել ժանտախտի վերաբերյալ։ Մենք չունենք բավարար տվյալներ՝ գնահատելու համաճարակաբանական իրավիճակն ու այլ երկրների համար առկա ռիսկերը, կամ անհրաժեշտության դեպքում համապատասխան միջոցներ ձեռնարկել այդ ռիսկերի առթիվ»,- հայտարարել է Եվրոպական հանձնաժողովի առողջապահության հարցերով խոսնակ Եվա Հռնչիրովան։
Այս հայտարարություններն արվել են այն օրը, երբ Եվրոպական հանձնաժողովը գումարել էր ԵՄ առողջապահական անվտանգության կոմիտեի նիստը՝ համախմբելով 27 անդամ պետությունների, ինչպես նաև Հիվանդությունների կանխարգելման և վերահսկման եվրոպական կենտրոնի և ԱՀԿ-ի ներկայացուցիչներին։
Հանձնաժողովը համակարգում է ԵՄ-ի արձագանքը առողջապահական լուրջ անդրսահմանային սպառնալիքներին՝ հնարավորություն ընձեռելով ազգային մարմիններին փոխանակել տեղեկատվություն, գնահատել ռիսկերը և քննարկել հնարավոր միջոցառումները։ Այնուամենայնիվ, այսօրվա նիստն ավարտվել է առանց որևէ կոնկրետ որոշման՝ Ռուսաստանից ստացված տեղեկատվության ոչ հավաստի լինելու պատճառով։
Հանձնաժողովը հայտարարել է, որ պատրաստ է կարճ ժամկետում կրկին հրավիրել հանձնաժողովի նիստ, եթե նոր տեղեկություններ ի հայտ գան կամ իրավիճակը վատթարանա։