Հութիները թիրախավորել են Սաուդյան Արաբիայի օդանավակայանները

«Անսար Ալլահ» շարժման հութիները հայտնել են, որ քաղաքացիական ավիացիայի օբյեկտների վրա վերջին հարվածի ժամանակ Սաուդյան Արաբիայի Ասիրի նահանգում թիրախավորել են «Աբհա» միջազգային օդանավակայանը։ «Արմենպրես»-ի փոխանցմամբ՝ այս մասին հաղորդում է հութիներին պատկանող Al Masirah հեռուստաալիքը։

«Բալիստիկ հրթիռը ճշգրիտ և ուղիղ էր, որի արդյունքում խաթարվել է օդանավակայանի օդային երթևեկությունը», - նշված է հայտարարության մեջ։

Հութիները կրկին զգուշացրել են բոլոր միջազգային ավիաընկերություններին չշարունակել թռիչքներ իրականացնել Սաուդյան Արաբիայի օդային տարածքով, քանի որ այն դարձել է Եմենի ռազմական գործողությունների թատերաբեմ, բացառությամբ Մեքքայի և Մեդինայի սրբազան քաղաքների օդային տարածքի։

Ավելի վաղ թիրախավորվել էին Ջազանի և Նաջրանի օդանավակայանները։

Հութիների ռազմական խոսնակ Յահյա Սարին X-ում հայտնել է, որ շարժումը բալիստիկ հրթիռներով թիրախավորել է սաուդական զորքերի հավաքատեղիները երկրի տարբեր շրջաններում, որի հետևանքով տասնյակ զոհեր ու վիրավորներ են գրանցվել։ Նա նաև հավելել է, որ կառավարական ուժերի առաջխաղացման մասին տարածվող տեղեկատվությունը «հորինված է»։

«Զինված ուժերը վերահսկողություն են պահպանում իրենց բոլոր նվաճումների նկատմամբ», - նշել է նա մեկ այլ գրառման մեջ։

Հութիները նաև հայտարարել են, որ հոկտեմբերի 6-ի առավոտյան սաուդական ուժերը հարձակում են իրականացրել Հաջջայի նահանգի ուղղությամբ։ Ումմ ադ-Դահի գյուղում հարձակման հետևանքով զոհվել է միևնույն ընտանիքի վեց անդամ, ևս մեկ երիտասարդ աղջիկ ծանր վիրավորվել է։

Իր հերթին, Սաուդյան Արաբիայի քաղաքացիական ավիացիայի գլխավոր վարչությունն X-ում գրառման մեջ հայտնել է, որ Նաջրան և Ջիզան քաղաքների օդանավակայանների վրա կատարված հարվածների հետևանքով երեք մարդ է վիրավորվել, գրանցվել են նյութական վնասներ։

ՄԱԿ-ի Միգրացիայի միջազգային կազմակերպության տվյալներով՝ օգոստոսի 1-ից մինչև հոկտեմբերի 4-ը Եմենում մարտական ​​գործողությունների հետևանքով տեղահանվել է ավելի քան 184 000 մարդ։

Ավելի վաղ հաղորդվել էր, որ Թուրքիան, Պակիստանը և Սաուդյան Արաբիան համաձայնության են եկել գործի դնել փոխադարձ պաշտպանության պայմանագրով նախատեսված «զսպման միջոցառումները» և արագորեն զորքեր տեղակայել Սաուդյան Արաբիայում՝ ի պատասխան հութիների հարձակումների։