Վառելիքի շրջանառության ոլորտը Մրցակցության և սպառողների շահերի պաշտպանության հանձնաժողովի ուշադրության կենտրոնում է. խոսնակ
1 րոպեի ընթերցում
Վերջին ամիսներին վառելիքի միջազգային բորսայական գների էական աճի պայմաններում Հայաստանի Հանրապետությունում ևս արձանագրվել է վառելիքի գների բարձրացում։
«Արմենպրես»-ի թղթակցի հետ զրույցում Մրցակցության և սպառողների շահերի պաշտպանության հանձնաժողովի մամուլի խոսնակ Անի Սմբատյանն ընդգծեց, որ վառելիքի շրջանառության ոլորտը մշտապես գտնվում է հանձնաժողովի ուշադրության կենտրոնում։
«Հանձնաժողովը համապատասխան պետական մարմիններից և ոլորտում գործունեություն իրականացնող տնտեսավարող սուբյեկտներից ամսական պարբերականությամբ ստանում և վերլուծում է վառելիքի շուկայում առկա իրավիճակի վերաբերյալ տեղեկատվություն, այդ թվում՝ վառելիքի պահեստներում առկա մնացորդների, ներմուծման գների և ծավալների, ինքնարժեքի և իրացման գների վերաբերյալ»,– նշեց նա։
Նշենք, որ վերջին շրջանում բենզինի թանկացումը լայն արձագանք էր ստացել լրատվամիջոցներում և սոցիալական ցանցերում։ Սեպտեմբերի վերջին որոշ լցակայաններում «ռեգուլյար» բենզինի գինը հասել է 600 դրամի, «պրեմիումինը»՝ գերազանցել 620 դրամը։