Հայաստանի և Ռուսաստանի առաջատար գիտնականները Երևանում քննարկում են գիտության և արդյունաբերության ոլորտներում ԱԲ կիրառման հեռանկարները

ՀՀ Գիտությունների ազգային ակադեմիայում (ԳԱԱ) Հայաստանի և Ռուսաստանի   առաջատար գիտնականների մասնակցությամբ սեպտեմբերի 29-ին մեկնարկեց մարդու գործունեության տարբեր ոլորտներում արհեստական բանականության կիրառման հնարավորություններին նվիրված երկօրյա քննարկում։ «Արմենպրես»-ի փոխանցմամբ՝ առաջին օրը հիմնական զեկույցով հանդես եկավ ՌԴ Դուբնայի Միջուկային հետազոտությունների միացյալ ինստիտուտի Միջուկային ռեակցիաների լաբորատորիայի գիտական ղեկավար Յուրի Հովհաննիսյանը։

«Արհեստական բանականությունը գիտության և արդյունաբերության մեջ․ հնարավորություններ և մարտահրավերներ» խորագրով քննարկումն ուղեկցվեց ուշագրավ ելույթներով և մտքերի փոխանակմամբ։ Առանձնակի ուշադրություն դարձվեց գիտական հայտնագործությունների վրա արհեստական բանականության ազդեցությանը, ինչպես նաև հիմնարար գիտության, արհեստական բանականության, գիտական հաշվարկների և արդյունաբերության համադրման պարագայում առաջացող նոր հնարավորություններին։

Քննարկվեցին մարդու և արհեստական բանականության փոխկապակցվածությանը, հաշվարկային և փորձարարական ենթակառուցվածքների դերին, ինչպես նաև արհեստական բանականության տեխնոլոգիաների մշակման և կիրառման ոլորտում գիտահետազոտական ինստիտուտների և արդյունաբերության միջև զարգացող համագործակցությանը վերաբերող հարցեր։ Անդրադարձ կատարվեց նաև արհեստական բանականության վրա հիմնված նորարարությունների հնարավորությունների օգտագործման և մարտահրավերների թեմային։

Էքսպերիմենտալ միջուկային ֆիզիկայի ոլորտում մասնագիտացած աշխարհահռչակ գիտնական Յուրի Հովհաննիսյանը, որի պատվին Դ. Մենդելեևի պարբերական աղյուսակի 118-րդ տարրը 2016 թվականին կոչվել է «օգանեսոն» (Og), «Արմենպրես»-ի հետ զրույցում մասնավորապես նշեց, որ գրագետ օգտագործման դեպքում արհեստական բանականությունը կարող է անհավանական հեռանկարներ ուրվագծել շատ ոլորտների համար։ Նա նշեց, որ հիմա աշխատանքներ են կատարվում Դ. Մենդելեևի պարբերական աղյուսակը քիմիական նոր տարրերով համալրելու ուղղությամբ։

Ռուսաստանի գիտությունների ակադեմիայի ակադեմիկոս և ՀՀ ԳԱԱ արտասահմանյան անդամ Յուրի Հովհաննիսյանը նշեց նաև, որ հայ գիտնականներն ավանդաբար առանձնացել են մասնագիտական բարձր որակներով և նրանց ներուժն այսօր էլ բավարարում է հայրենի գիտության զարգացումը նոր բարձունքների հասցնելու համար։

Սեպտեմբերի 30-ին շարունակվելիք քննարկումը ծավալվելու է «Արհեստական բանականությունը կենսաբժշկության, դեղագործության և նյութագիտության մեջ․ գենոմային տվյալներից մինչև նոր դեղամիջոցներ և նյութեր» խորագրի ներքո։

Քննարկվելու են կենսաբժշկության, գենոմիկայի, դեղագործության և նյութագիտության ոլորտներում արհեստական բանականության մեթոդների կիրառման և զարգացման ժամանակակից ուղղությունները, ինչպես նաև ներկայացվելու են հայկական գիտական և կրթական կազմակերպությունների և ռուսական գիտական կենտրոնների նախագծերը։

Քննարկումներն անցկացվում են Դուբնայի Միջուկային հետազոտությունների միացյալ ինստիտուտի հիմնադրման 70-ամյակի կապակցությամբ Հայաստանում կազմակերպված օրերի շրջանակում։