Ռուբիոն Լիբանանի վարչապետի հետ քննարկել է Իսրայելի հետ կնքված եռակողմ շրջանակային համաձայնագրի իրագործումը
2 րոպեի ընթերցում
ԱՄՆ պետքարտուղար Մարկո Ռուբիոն Վաշինգտոնում հանդիպել է Լիբանանի վարչապետ Նավաֆ Սալամի հետ։ «Արմենպրես»-ի փոխանցմամբ՝ այս մասին հաղորդում է ԱՄՆ պետքարտուղարությունը։
Ռուբիոն վերահաստատել է Միացյալ Նահանգների հաստատակամ հանձնառությունն՝ աջակցելու Լիբանանին եռակողմ շրջանակային համաձայնագրի իրականացման գործում, ինչը Լիբանանի և Իսրայելի միջև կայուն խաղաղության հասնելու միակ ուղին է։
Նա բարձր է գնահատել վարչապետ Սալամի կառավարության ջանքերն՝ ուղղված պետական իշխանության տարածմանը, և վերահաստատել է ԱՄՆ-ի աջակցությունն ինքնիշխան Լիբանանի պետությանը, որը «զերծ կլինի «Հեզբոլլահ»-ի և Իրանի կործանարար ազդեցությունից»։
Լիբանանի վարչապետն իր հերթին X հարթակում գրառման մեջ նշել է, որ հանդիպման ընթացքում ընդգծել է եռակողմ շրջանակային համաձայնագրի ակտիվացման փուլ անցնելու և փոխադարձության ու փուլային իրականացման սկզբունքները գործնական քայլերի և տեղում շոշափելի արդյունքների վերածելու անհրաժեշտությունը։
«Սա կհանգեցնի Լիբանանի լիակատար ինքնիշխանության վերականգնմանը, Իսրայելի լիակատար դուրսբերմանը Լիբանանի տարածքից և երկրի ողջ տարածքում զենքի նկատմամբ պետության վերահսկողության ապահովմանը», - նշել է նա։
Վարչապետը նաև ընդգծել է համաձայնագրում նշված պարտավորությունների իրականացման համար հստակ ժամանակացույց սահմանելու կարևորությունը։
Հունիսի 26-ին Իսրայելը և Լիբանանը Վաշինգտոնում ԱՄՆ-ի միջնորդությամբ շրջանակային համաձայնագիր են ստորագրել, համաձայն որի՝ իսրայելցի զինվորականները փուլ առ փուլ դուրս կբերեն իրենց զորքերը Լիբանանի հարավում գտնվող իրենց զբաղեցրած վայրերից, որից հետո Լիբանանի զինվորականները կվերահսկեն անվտանգության միջոցառումները և «Հեզբոլլահ»-ի զինաթափումը։
Չնայած ստորագրված համաձայնագրին՝ Իսրայելը շարունակում է թիրախավորել Լիբանանի հարավային շրջանները, որի հետևանքով հազարավոր մարդիկ տեղահանվել են, զոհվել ու վիրավորվել։