Շրջանառության մեջ է դրվել «Հայաստան-Վատիկան համատեղ թողարկում. Մխիթար Սեբաստացու ծննդյան 350-ամյակ» թեմային նվիրված նամականիշը

Գիտություների ազգային ակադեմիայում շրջանառության մեջ դրվեց նամականիշ՝ նվիրված «Հայաստան-Վատիկան համատեղ թողարկում. Մխիթար Սեբաստացու ծննդյան 350-ամյակ» թեմային:

«Արմենպրես»-ի հաղորդմամբ՝ ՀՀ ԱԳՄԱ նախարարության գլխավոր քարտուղար Դավիթ Կարապետյանը Սուրբ Աթոռի գործընկերներին շնորհակալություն հայտնեց համատեղ նամականիշ թողարկելու կապակցությամբ։

«Սա լավ հիմք է՝ ցույց տալու այն գործընկերության մակարդակը, որ մենք ունենք Սուրբ Աթոռի հետ։ Դա շատ լավ արտացոլում է նաև այն կապերն ու հնարավորությունները, որ գոյություն ունեն մեր երկու պետությունների միջև։ Ցանկանում ենք, որ այս նամականիշը հնարավորինս երկար կյանք ունենա»,- ասաց Կարապետյանը։

ՀՀ-ում Սուրբ Աթոռի առաքելական նվիրակ, արիապատիվ Անտե արքեպիսկոպոս Յոզիչը նշեց, որ նամականիշի թողարկումը Հայաստանի և Վատիկանի՝ մասնավորապես Վատիկան քաղաք-պետության, «ՎատիկանՓոստ»ի և «ՀայՓոստ»-ի միջև սերտ համագործակցության օրինակներից մեկն է։

Նա հիշեցրեց, որ Մխիթարյան միաբանությունն իր հերթին այս տարի նշում է իր հիմնադրման 326-ամյակը և շարունակում է մնալ Հայաստանի և Կաթողիկե Եկեղեցու միջև մշակութային կարևորագույն կամուրջներից մեկը։

«Քարոզիչների այս կրոնական միաբանությունը նվիրված է հայ ժողովրդի կրթական և հոգևոր մակարդակի բարձրացմանը՝ հիմք ընդունելով Արևմտյան Եկեղեցու օրինակները։ Բազմաթիվ խրթին մարտահրավերների բերումով Սեբաստացի Մխիթար աբբահայրը Վենետիկի Հանրապետությանը հորդորեց միաբանությունը տեղափոխել Սուրբ Ղազար կղզի և այնտեղ կառուցել վանք, որպեսզի Մխիթարյան եղբայրների հետ շարունակի իր առաքելությունը։ Այսօր հիշատակելով Մխիթար Սեբաստացու 350-ամյակը և նրա եկեղեցական ծառայությունն ի դեմս խորաթափանց հոգևոր առաջնորդի՝ մենք աջակցում ենք Մխիթարյան միաբանությանը՝ դառնալու հավատքի, գրականության ու մշակույթի ուժեղ կամուրջ, որն առավել սերտորեն կապում է հայ ժողովրդին Սուրբ Աթոռի հետ»,- ասաց արքեպիսկոպոս Յոզիչը։

Նա հույս հայտնեց, որ սույն նամականիշի թողարկումը կմնա որպես մնայուն վկայություն Սուրբ Աթոռի և Հայաստանի Հանրապետության՝ առաջին քրիստոնյա երկրի բարեկամական հարաբերությունների պատմական, մշակութային և քաղաքացիական նշանակություն ունեցող նոր ու կարևոր հանգրվանի։ 

«Նույն արարողությունն այս պահին տեղի է ունենում նաև Վատիկանում և այս միջոցառման շնորհիվ մեր համատեղ նամականիշները կշրջեն աշխարհով մեկ՝ տարածելով ձեր երկրի ավանդական, բարոյական և ընտանեկան արժեքները, որոնց հավատարիմ էր և որոնք քարոզում էր Մխիթար աբբահայրը՝ հռչակելով մեր փրկիչ Հիսուս Քրիստոսի բարի լուրը։ Երևանի և Վատիկանի կրկնակի դրոշմը կրող այս հատուկ նամականիշի մարումը թող սովորական փոստային գործիքը վերածի մնայուն պատմական վկայության և վկայի մեր հավաքական հանձնառության մասին՝ պահպանելու բարեկամական կապերը, ակադեմիական ժառանգությունը և պատմական ձեռքբերումները, որոնք բնորոշում են մեր հարատև հարաբերությունները»,- ասաց արքեպիսկոպոս Յոզիչը։ 

Ֆիլատելիստների հայկական ասոցիացիայի նախագահ Հովիկ Մուսայելյանը նշեց, որ քրիստոնեության թեման ֆիլատելիայում ամենաընդունված թեմաներից է, և միլիոնավոր մարդիկ ամբողջ աշխարհում հավաքում են քրիստոնեությանը նվիրված փոստային ծրարներ, բացիկներ, նամականիշներ։

«Այսօր ֆիլատելիստների համար շատ խորհրդանշական է, որ Վատիկանի ու Հայաստանի համատեղ ուժերով թողարկվում է նամականիշ։ «ՎատիկանՓոստ»-ն աշխարհում ամենահեղինակավոր փոստային ծառայություններից մեկն է և ամենահիշարժան իրադարձություններին նվիրված նամականիշներ է տպագրում։ Վատիկանում կան հայկական թեմային նվիրված բազմաթիվ բացիկներ, ծրարներ ու նամականիշներ։ Վատիկանը դրանով մեծարում է մի ժողովրդի, որն աշխարհում առաջինն է պետականորեն ընդունել քրիստոնեությունը»,- ասաց Մուսաելյանը։

Նա հիշեցրեց, որ Վատիկանում թողարկվել են նաև Հայաստանի կողմից քրիստոնեության ընդունման 1700-ամյակին նվիրված նամականիշներ ու բացիկներ, ինչպես նաև Հովհաննես Պողոս և Ֆրանցիսկոս Պապերի հայաստանյան այցերին նվիրված նամականիշներ։

380 դրամ արժողությամբ նամականիշի վրա քաղաքական, հասարակական և մշակութային գործիչ, հայագետ, Մխիթարյան միաբանության հիմնադիր Մխիթար Սեբաստացին պատկերված է Սուրբ Ղազար կղզու փորագրանկարի խորապատկերին։

Նամականիշի մարումն իրականացրին ՀՀ ԲՏԱԱԲ փոխնախարար Գևորգ Մանթաշյանը, ՀՀ ԱԳՄԱ նախարարության գլխավոր քարտուղար Դավիթ Կարապետյանը, ՀՀ ԱԺ պատգամավոր Արայիկ Հարությունյանը, ՀՀ-ում Սուրբ Աթոռի առաքելական նվիրակ, արիապատիվ Անտե արքեպիսկոպոս Յոզիչը, Հայ Կաթողիկե եկեղեցու Հայաստանի, Վրաստանի և Արևելյան Եվրոպայի առաջնորդ Գևորգ արքեպիսկոպոս Նորատունկյանը, «ՀայՓոստ» ՓԲԸ գլխավոր տնօրեն Շուշան Ալեքսանյանը, Ֆիլատելիստների հայկական ասոցիացիայի նախագահ Հովիկ Մուսայելյանը։