3 րոպեի ընթերցում
«Արմենպրես» լրատվական գործակալությունը ներկայացնում է իր հեղինակային «Նոր գիրք» նախագիծը: Այն ամեն երկուշաբթի ընթերցողի դատին է հանձնում հայաստանյան հրատարակչությունների լույս ընծայած գրքերը: Գործակալության էջերում ընթերցասերները հնարավորություն ունեն տեղեկատվություն ստանալ նոր գրքերի մասին, ծանոթանալ դասական գործերին և արդի գրականության զարգացման միտումներին:
Այս շաբաթ «Արմենպրես»-ն առանձնացրել է 2026 թվականին հրատարակված և հանրության դատին հանձնված տարբեր հրատարակչությունների ուշագրավ գրքեր՝ տարբեր խորագրերի ներքո:
Թարգմանական գրականություն․ Թեա Թոփուրիա, «Յակոբի ջրհորի մոտ»
Թեա Թոփուրիայի վեպը մոգական ռեալիզմի փայլուն նմուշներից է, որտեղ միահյուսվում են առասպելականն ու իրականը։ Փոքր ազգի իրական ողբերգությունն այստեղ բարձրացվում է տիեզերական, առասպելական մակարդակի: Հեղինակի ուշադրության կենտրոնում մարդն է՝ առանձին և հասարակության մեջ: Վեպում նկարագրվում է մի փոքր ժողովրդի պատմություն, որի մեծ մասը ստիպված է եղել փախչել նվաճողներից և վերաբնակվել:
Այս խոր, հուզական և պատկերավոր գիրքը կորստի, հիշողության և տիեզերական անդորրի որոնման մասին է:
Ընթերցողին սպասվում են բազմաշերտ ու չափազանց հետաքրքիր համեմատություններ, և ընթերցանության ամբողջ ընթացքում լսվելու է հորդառատ ու տևական անձրևի ձայնը: Թարգմանությունը վրացերենից՝ Անի Աստատուրյանի։ Խմբագիր՝ Արքմենիկ Նիկողոսյան։ Գիրքը լույս է ընծայել «Անտարես»-ը:
Մանկապատանեկան գրականություն․ Լոիս Լոուրի¸ «Պարգևողը»
Ի՞նչ է հիշողությունը: Արդյոք մենք ավելի երջանիկ կլինենք, եթե չհիշենք մարդկության պատմության դառը անցյալը: Գուցե աշխարհն ավելի արդար լինի, եթե վերանան մարդկանց միջև եղած տարբերությունները:
Վեպում հարցականի տակ են դրվում բոլոր արժեքները, որոնք մենք բնական ենք համարում, և վերաիմաստավորվում են մեր ամենախոր համոզմունքները:
1994 թվականին «Պարգևողը» վեպը արժանացել է Նյուբերիի մեդալի ամերիկյան մանկական գրականության մեջ ունեցած ամենամեծ ներդրման համար։ Թարգմանիչ՝ Մարիա Սադոյան։ Գիրքը լույս է ընծայել «Զանգակ»-ը:
Նոն ֆիքշն գրականություն․ Արա Զարգարյան, «Ակսել Բակունցի «Մթնաձորը»
«Ակսել Բակունցի «Մթնաձոր» պատմվածքի գրության եւ առաջին հրատարակման հարյուրամյակին նվիրված այս գիրքը ստեղծագործության համապարփակ ուսումնասիրություն է։ Այն ներկայացնում է պատմվածքի ստեղծման պատմությունը, նախատիպերը, պատմաաշխարհագրական հիմքերն ու մշակութային շերտերը։
Գիրքը հիմնված է արխիվային եւ փաստագրական հարուստ նյութերի ու լուսանկարների վրա։
«Մթնաձոր» պատմվածքը դիտարկվում է ոչ միայն որպես գրական ստեղծագործություն, այլեւ որպես Սյունիքի պատմական հիշողության եւ մշակութային ժառանգության կարեւոր վկայություն»: Գիրքը լույս է ընծայել Newmag-ը։