2 րոպեի ընթերցում
ԱՄՆ նախագահ Դոնալդ Թրամփը ստորագրել է Ռուսաստանի նկատմամբ պատժամիջոցները և մաքսատուրքերի կիրառման հնարավորություններն ընդլայնող օրենքը, որը հայտնի է որպես «դժոխային պատժամիջոցների» օրենք։ «Արմենպրես»-ի հաղորդմամբ՝ վկայակոչելով Սպիտակ տան պաշտոնական հաղորդագրությունը՝ Թրամփը սեպտեմբերի 18-ին ստորագրել է H.R. 5334 օրինագիծը՝ այն օրենքի ուժ է ստացել։
Փաստաթղթի պաշտոնական անվանումն է «Լինդսի Օ. Գրեհեմի՝ Ռուսաստանի և Իրանի նկատմամբ պատժամիջոցների մասին 2026 թվականի ակտ»։ Սպիտակ տան պարզաբանմամբ՝ այն թույլ է տալիս սահմանել և ընդլայնել Ռուսաստանի նկատմամբ օրենքով նախատեսված պատժամիջոցները, մաքսատուրքերը և արգելքները, ինչպես նաև երկարաձգում է Իրանի դեմ գործող պատժամիջոցները։
ԱՄՆ Սենատի արտաքին հարաբերությունների հանձնաժողովի պաշտոնական հաղորդագրության համաձայն՝ օրենքը նախատեսում է առաջնային և երկրորդային պատժամիջոցներ Ռուսաստանի ու նրա դեմ սահմանված սահմանափակումները շրջանցելուն աջակցող անձանց և կազմակերպությունների նկատմամբ։ Թիրախների թվում են ռուսաստանցի պաշտոնյաները, խոշոր գործարարները և նրանց ընտանիքների անդամները, բանկերն ու ֆինանսական կազմակերպությունները, ինչպես նաև ռուսական նավթի տեղափոխմամբ զբաղվող այսպես կոչված «ստվերային նավատորմի» նավերը։
Օրենքը ԱՄՆ նախագահին հնարավորություն է տալիս մինչև 100 տոկոս մաքսատուրքեր սահմանել ռուսական նավթի և գազի հինգ խոշորագույն գնորդներից ներմուծվող ապրանքների նկատմամբ։ Նման սահմանափակումներ կարող են կիրառվել նաև այն հինգ երկրների նկատմամբ, որոնք առավել ակտիվորեն նպաստում են Ռուսաստանի էներգետիկ ոլորտի դեմ պատժամիջոցների շրջանցմանը։ Հնարավոր հասցեատերերի թվում ամերիկացի օրենսդիրներն առանձնացրել են Չինաստանը և Հնդկաստանը։