Արհեստական բանականության հետ կապված մտավախությունները հիմնավորված են, սակայն հարկավոր է վստահել ԱԲ ընկերություններին. OpenAI-ի ղեկավար
3 րոպեի ընթերցում
Հանրության շրջանում արհեստական բանականության (ԱԲ) հետ կապված ռիսկերի վերաբերյալ մտահոգությունների ֆոնին ChatGPT-ն ստեղծած OpenAI ընկերության ղեկավար Սեմ Ալթմանը հայտարարել է, որ մարդիկ պետք է ավելի մեծ վստահություն ունենան իր ընկերության և նմանատիպ այլ կազմակերպությունների նկատմամբ, որ իրենք ճիշտ քայլեր կձեռնարկեն ԱԲ զարգացման գործընթացում։ «Արմենպրես»-ի փոխանցմամբ՝ այս մասին հաղորդում է BBC-ն։
Ալթմանը նշել է, որ իր կարծիքով՝ ԱԲ ընկերություններն ի վիճակի են ինքնակարգավորվել։
«Աշխարհը պետք է վստահի, որ մենք ճիշտ քայլեր կձեռնարկենք, քանի որ դա ճիշտ քայլ է, և մենք գիտակցում ենք այս ամենի մասշտաբայնությունը», - ասել է Ալթմանը սեպտեմբերի 15-ին Սան Ֆրանցիսկոյում Salesforce ծրագրային ապահովման ընկերության կողմից կազմակերպված ամենամյա համաժողովի ժամանակ։
Այնուամենայնիվ, նա նշել է, որ ԱԲ-ի հետ կապված մարդկանց մտավախությունները հիմնավորված են, քանի որ այդ գործիքների հնարավորություններն արագորեն զարգանում են։
«Այլևս մեծ երևակայություն պետք չէ պատկերացնելու համար, թե ինչպես կարող է իրավիճակը վատթարանալ, - ասել է նա։ - Կարծում եմ՝ աշխարհն իրավացի է, որ վախենում է սրանից»։
Սա նրա առաջին հրապարակային ելույթն էր անցյալ շաբաթ Anthropic ընկերությունից հեռացած հետազոտող Ջեյքոբ Քոքսոնի գրառումից հետո, որում նա պնդել էր, որ եթե ԱԲ-ի զարգացումը չվերահսկվի, ապա մինչև տասնամյակի վերջը այն կարող է ոչնչացնել ամբողջ մարդկությունը։
ԱԲ-ի ոլորտի մի շարք ղեկավարներ և փորձագետներ արձագանքել են՝ հայտնելով իրենց համաձայնությունը այդ գնահատականի հետ, թեև չեն պարզաբանել, թե ինչպես են հանգել նման եզրակացության, կամ թե կոնկրետ ինչպես կարող է ԱԲ-ն նման բան իրականացնել։
Այս պնդումների շուրջ ծավալված բուռն քննարկումները հանգեցրել են արհեստական բանականության ոլորտում իրականացվող մշակումների նկատմամբ ավելի մեծ ուշադրության։ Իր հերթին՝ Anthropic-ի գործադիր տնօրեն Դարիո Ամոդեյը կոչ է արել դանդաղեցնել ԱԲ-ի մշակման ընդհանուր տեմպերը և հորդորել է կառավարություններին կարգավորել այդ ոլորտը։
Այդ հայտարարությունը ողջունել են Սեմ Ալթմանը, Google-ի DeepMind-ի համահիմնադիր Դեմիս Հասաբիսը, ինչպես նաև Իլոն Մասկը՝ X սոցիալական հարթակի և Grok ԱԲ-օգնականի սեփականատերը։
Միևնույն ժամանակ Վաշինգտոնում ելույթ ունենալիս ձախակողմյան հայացքներ ունեցող սենատոր Բեռնի Սանդերսը և ԱՄՆ նախագահ Դոնալդ Թրամփի նախկին խորհրդական Սթիվ Բենոնը կոչ են արել խստացնել ԱԲ ոլորտի կարգավորումը։
Թրամփը, սակայն, համաձայն չէ, որ ԱԲ-ն կարող է վտանգ ներկայացնել։ Նա հերքել է նման պնդումները՝ դրանք անվանելով կեղծիք։