Հութիները հայտարարել են Սաուդյան Արաբիայի «Խալիդ արքա» ավիաբազան թիրախավորելու մասին

Եմենի «Անսար Ալլահ» շարժման հութիները սեպտեմբերի 14-ին հայտարարել են, որ Սաուդյան Արաբիայի Խամիս Մուշաիտ շրջանում գտնվող «Խալիդ արքա» ավիաբազայում իրականացրել են լայնածավալ ռազմական գործողություն՝ ի պատասխան Սաուդյան Արաբիայի վերջին ագրեսիվ գործողությունների։ «Արմենպրես»-ի փոխանցմամբ՝ այս մասին հայտնում է հութիներին պատկանող Al Masirah հեռուստաալիքը։

«Եմենի զինված ուժերը լայնածավալ ռազմական գործողություն են իրականացրել՝ թիրախավորելով ռազմական օբյեկտներն ու ենթակառուցվածքները, այդ թվում՝ ռազմական ինքնաթիռների անգարները, ռադարները, թռիչքուղիները, զինամթերքի պահեստները և Խամիս Մուշաիտում գտնվող «Խալիդ արքա» ավիաբազայի այլ թիրախներ», - հայտարարել է հութիների խոսնակ Յահյա Սարին։

Հայտարարության մեջ նշվել է, որ գործողությունն իրականացվել է տասնյակ բալիստիկ հրթիռների և անօդաչու թռչող սարքերի միջոցով, և որ գործողությունը զգալի վնասներ է պատճառել բազային։

Նշվել է, որ գործողությունն իրականացվել է ի պատասխան Սաուդյան Արաբիայի կողմից իրենց երկրի ու ժողովրդի դեմ ուղղված ագրեսիայի, ինչպես նաև վերջին հինգ օրերի ընթացքում F-15 և Typhoon կործանիչների միջոցով Թագավորության կողմից իրականացված ավելի քան 300 ավիահարվածների։

Խոսնակը հայտնել է, որ Եմենի ուժերը կշարունակեն իրենց ռազմական գործողությունները Սաուդյան Արաբիայի տարածքի ուղղությամբ, քանի դեռ «Թագավորությունը շարունակում է իր ագրեսիան Եմենի դեմ»։