«Աբովյան» ՔԿՀ-ում քննարկվել են օտարերկրացիների և ապաստան հայցողների իրավունքների ապահովման հարցերը
1 րոպեի ընթերցում
Հայաստանի մարդու իրավունքների պաշտպանի աշխատակազմի ներկայացուցիչներն այցելել են ՀՀ արդարադատության նախարարության «Աբովյան» քրեակատարողական հիմնարկ։ «Արմենպրես»-ի փոխանցմամբ՝ այս մասին հայտնում են Մարդու իրավունքների պաշտպանի աշխատակազմից։
Այցը տեղի է ունեցել ՄԱԿ-ի Փախստականների հարցերով գերագույն հանձնակատարի գրասենյակի, Միգրացիայի և քաղաքացիության ծառայության ու Փաստաբանների պալատի ներկայացուցիչների մասնակցությամբ։
Այցի շրջանակում պատվիրակության անդամները հանդիպել են քրեակատարողական հիմնարկի ղեկավար կազմի հետ։ Քննարկվել են ազատությունից զրկված օտարերկրյա քաղաքացիների իրավունքների ապահովմանը վերաբերող հարցեր։
Առանձնահատուկ ուշադրություն է դարձվել քրեակատարողական հիմնարկում գտնվող ապաստան հայցողների իրավունքների ապահովման վիճակին։
Մարդու իրավունքների պաշտպանի աշխատակազմից ընդգծել են, որ ազատությունից զրկման վայրերում մարդու իրավունքների ապահովման հարցերը մշտապես գտնվում են Պաշտպանի անմիջական ուշադրության կենտրոնում։