Սեուտայի բնակիչները փորձել են դադարեցնել ներգաղթյալների համար կենտրոնի շինարարությունը

Հյուսիսային Աֆրիկայում գտնվող իսպանական Սեուտա քաղաքի բնակիչները սեպտեմբերի 4-ին փորձել են խաթարել մանկապարտեզի հարևանությամբ մոտ 900 ներգաղթյալների տեղակայման համար նախատեսված կենտրոնի շինարարությունը։ «Արմենպրես»-ի հաղորդմամբ՝ այս մասին տեղեկացնում է Իսպանիայի պետական ​​հեռարձակող RTVE ընկերությունը։

Նշվում է, որ Սեուտայի ​​մի խումբ բնակիչներ, դպրոցի աշակերտների ծնողներ և ուսուցիչներ փորձել են խանգարել Լոս Ռոսալես թաղամասում գտնվող Nuestra Senora de Africa մանկապարտեզի հարևանությամբ կենտրոնի շինարարության իրականացմանը։ Բողոքի գործողության մասնակիցներին հաջողվել է մի քանի ժամ խոչընդոտել շինարարությանը։ Նրանք տարածքը լքել են անսալով ոստիկանության աշխատակիցների հորդորներին։

Կառուցվող կենտրոնի հարևանությամբ գտնվող մանկապարտեզը նախատեսված է մինչև երեք տարեկան մոտ 200 երեխաների համար։ Քաղաքում տիրող իրավիճակի պատճառով այն աշխատանքները դադարեցրել է մինչև սեպտեմբերի 28-ը։

Սա Սեուտայում առաջին նմանատիպ բողոքի ցույցը չէ։ Սեպտեմբերի 2-ին տասնյակ բնակիչներ բողոքի գործողություն էին անցկացրել նավահանգստի արևմտյան նավամատույցի մոտ՝ բնակելի թաղամասերի և մի քանի կրթական հաստատությունների կողքին ներգաղթյալների մեկ այլ ​​կենտրոնի ստեղծման դեմ։

Մարոկկոյին սահմանակից Սեուտան հուլիսի վերջին ենթարկվել էր անօրինական ներգաղթյալների զանգվածային ներթափանցման։ Իսպանիայի ներքին գործերի նախարարությունը հայտնել էր Մարոկկոյից ներթափանցած մոտ 72 հազար սահմանախախտի մասին։ Երկրի վարչապետ Պեդրո Սանչեսը օգոստոսի վերջին հայտարարել էր, որ քաղաքում մնացել է մոտ 5 հազար ներգաղթյալ։