Հովհաննես Բաբախանյանն ու Նարինե Չիլինգարյանը Երևանում հանդես կգան «Գերին և Գրեյսը» ներկայացմամբ
2 րոպեի ընթերցում
ԱՄՆ-ում բնակվող ՀՀ վաստակավոր արտիստ Հովհաննես Բաբախանյանը հյուրախաղերով հանդես կգա հայրենիքում։ Բաբախանյանն ու դերասանուհի Նարինե Չիլինգարյանը սեպտեմբերի 16-17-ին Հ. Ղափլանյանի անվան դրամատիկական թատրոնում հանդիսատեսի դատին կհանձնեն «Գերին և Գրեյսը» տրագիկոմեդիան:
«Արմենպրես»-ի հաղորդմամբ՝ ներկայացումը բեմադրել է դերասանի որդին՝ ռեժիսոր Գոռ Բաբախանյանը: Այն առաջին անգամ խաղացել են Լոս Անջելոսի El Portal թատրոնում:
«Գերին և Գրեյսը» ներկայացումը պատմում է ծերանոցում հայտնված տարեց մարդկանց ճակատագրերի, հույսի և ջերմության մասին: Գերին, որին մարմնավորում է Հովհաննես Բաբախանյանը, տարեց հայ տղամարդ է (հայկական իրականության և արմատների կրողը), որը նույնպես հայտնվել է այդ միջավայրում:
Նարինե Չիլինգարյանը մարմնավորում է Գրեյսին՝ 80 տարեկան ամերիկուհու, որն ապրում է անցյալի հիշողություններով և հույսով, որ մի օր իր փեսացուն պատերազմից վերադառնալու է: Հակառակ իրենց տարիքին, առողջական խնդիրներին ու կյանքի դժվարություններին՝ հերոսները լեցուն են ապրելու ցանկությամբ, լավատեսությամբ ու հումորով:
Նրանց միջև ձևավորվող ջերմ հարաբերություններն օգնում են հաղթահարել մենությունն ու լքվածության զգացումը:
Ներկայացումը երիտասարդներին հորդորում է ջերմ վերաբերմունք ցույց տալ ավագներին և հիշել, որ մի օր իրենք կարող են լինել այդ տարիքում: Այն կոչ է անում հիմա գնահատել նրանց. այն ժամանակ, երբ նրանք երիտասարդների կողքին են: