Հայաստանի ԱԳՆ-ն ցավակցել է Նեպալում և Չինաստանում ջրհեղեղի հետևանքով զոհերի ընտանիքներին

Հայաստանի Հանրապետության արտաքին գործերի նախարարությունը ցավակցական ուղերձ է հղել Նեպալում և Չինաստանում ջրհեղեղի հետևանքով զոհվածների ընտանիքներին։

«Արմենպրես»-ի հաղորդմամբ՝ X-ի միկրոբոլգում արված գրառման մեջ ՀՀ արտաքին գերատեսչությունը, մասնավորապես, նշել է․

«Խորապես վշտացած ենք Նեպալում և Չինաստանում մոլեգնող սարսափելի ջրհեղեղների լուրերից, որոնք բազմաթիվ զոհերի ու ավերածությունների պատճառ են դարձել։ Անկեղծ ցավակցություն ենք հայտնում բոլոր զոհերի ընտանիքներին և աղոթում բոլոր տուժածների շուտափույթ ապաքինման համար»։

Deeply saddened by the news of the horrible flash floods that struck Nepal & China, causing so many fatalities and devastation. Sincere condolences to the families of all the victims, with prayers for the swift recovery of all those affected.@MofaNepal @MFA_China

— MFA of Armenia🇦🇲 (@MFAofArmenia) August 27, 2026

Օգոստոսի 26-ին Նեպալի և Չինաստանի սահմանին տասնյակ մետր բարձրությամբ հեղեղի ալիքն ամեն ինչ քշել-տարել է իր ճանապարհին. ավերվել են գյուղեր, շենքեր, ճանապարհներ, կամուրջներ, հիդրոէլեկտրակայաններ։

Նեպալի պաշտոնյաների նախնական հաղորդագրությունների համաձայն՝ ջրհեղեղի պատճառ կարող էր դառնալ տարածքում տեղի ունեցած երկրաշարժի հետևանքով սառցադաշտի ստորին մասի փլուզումը։ Սակայն ԱՄՆ երկրաբանական ծառայությունը հայտնել է, որ արձանագրված 4,4 մագնիտուդով երկրաշարժն, ըստ էության, սառցադաշտային ապարների և սառույցի փլուզման և բեկորների հոսքի սեյսմիկ էներգիան է եղել։

Լեռնային ապարների և սառույցի հոսքը փակել է Լհենդե գետի հունը՝ առաջացնելով հզոր կասկադային հեղեղում։ Վերջին տեղեկություններով՝ զոհվել է 175 մարդ։ Նեպալում անհետ կորած է ավելի քան 800 մարդ, այդ թվում՝ 600 օտարերկրացի։

Տիբեթում անհետ կորել է շուրջ 600 մարդ, այդ թվում՝ 260 օտարերկրացի։