Եմենի կառավարական ուժերը հայտնել են Մոխայի նավահանգստի վրա հութիների հարձակման մասին

Եմենի միջազգայնորեն ճանաչված կառավարությանը պատկանող զինված ուժերը հայտարարել են, որ «Անսար Ալլահ» խմբավորման հութիները բալիստիկ հրթիռներով թիրախավորել են Կարմիր ծովի ափին գտնվող Մոխայի նավահանգիստը։ «Արմենպրես»-ի փոխանցմամբ՝ այս մասին հաղորդում է Եմենի զինված ուժերի մեդիա կենտրոնը X-ում գրառման մեջ։

«Հութիների ահաբեկչական աշխարհազորայինները չորեքշաբթի երեկոյան երեք բալիստիկ հրթիռ են արձակել Թաիզի նահանգի արևմտյան մասում գտնվող Մոխայի նավահանգստի վրա, բացի այդ, չորրորդ հրթիռն ընկել է ալ-Խաուխա քաղաքում», - նշված է գրառման մեջ։

Ռազմական աղբյուրը հայտնել է, որ հութիները հրթիռներն արձակել են Թաիզ քաղաքի արևելյան հատվածում իրենց վերահսկողության տակ գտնվող շրջաններից։

Կառավարական ուժերը հայտարարել են, որ իրենց պաշտպանական ուժերն արձագանքել են հարձակմանը, սակայն զոհերի կամ վնասների մասին տեղեկություններ չեն հաղորդել։

Բաբ էլ-Մանդեբի նեղուցի մոտ գտնվող Մոխայի նավահանգիստը Եմենի հարավ-արևմուտքի համար կենսական տնտեսական ուղի է համարվում։ Այն վերջին ամիսներին բազմիցս թիրախավորվել է։

2014 թվականի վերջից ապստամբ հութիները, որոնք վայելում են Իրանի աջակցությունը, վերահսկում են Եմենի մայրաքաղաք Սանան, ինչպես նաև երկրի հյուսիսի և արևմուտքի զգալի մասը։ Կառավարական ուժերը, որոնց աջակցում են Սաուդյան Արաբիան և տարածաշրջանային երկրները, պահպանում են վերահսկողությունը արևմտյան ափի երկայնքով գտնվող շրջանների նկատմամբ։