ՀԱՊԿ-ի նկատմամբ հետաքրքրությունը սպառված է, գոհ կլինեմ, եթե մեզ հեռացնեն կազմակերպությունից. վարչապետ

Հայաստանի վարչապետ Նիկոլ Փաշինյանը վստահեցրել է, որ Երևանը ՀԱՊԿ-ում  իր աշխատանքները չի ակտիվացնելու և կազմակերպության նկատմամբ հետաքրքրությունը սպառված է։

«Արմենպրես»-ի հաղորդմամբ՝ վարչապետ Նիկոլ Փաշինյանը թեմային անդրադարձել է Ազգային ժողովում ՀՀ կառավարության 2026-2031 թվականների ծրագրի քննարկումների ժամանակ։

Վարչապետը, անդրադառնալով առաջիկա հինգ տարում ՀԱՊԿ-ից Հայաստանի դուրս գալու հավանականության մասին հարցին, նշել է, որ կազմակերպությունը Հայաստանի կողմից ուղղված հարցերի վերաբերյալ ոչ մի պատասխաններ չի ստացել, և հետևաբար էլ, ՀԱՊԿ-ի վերաբերյալ հետաքրքրությունը սպառված է։

«Առաջիկա 5 տարում մենք ՀԱՊԿ վերադառնալու ոչ մի պլան չունենք։ Կարող եմ վստահ ասել՝ մենք ՀԱՊԿ-ում մեր աշխատանքները չենք ակտիվացնելու։ Գիտեմ, որ ՀԱՊԿ-ում քննարկումներ կան, ու կարող են երկրին հեռացնել կազմակերպությունից։ Ես շատ գոհ կլինեմ, եթե կազմակերպությունը որոշի Հայաստանին հեռացնել ՀԱՊԿ-ից։ Մեզ կազատի դուրս գալ-չգալու երկընտրանքից»,-նշեց Փաշինյանը՝ հավելելով, որ կառավարության 2026-2031 թվականների ծրագրում գեթ մեկ հիշատակում չկա այդ կազմակերպության մասին։

Հայաստանը 2024 թվականի փետրվարից սառեցրել է իր մասնակցությունը ՀԱՊԿ-ի աշխատանքներին։ Հայաստանի վարչապետ Նիկոլ Փաշինյանն այդ մասին հայտնել էր France 24-ին տված հարցազրույցում՝ շեշտելով, որ ՀԱՊԿ-ը չի կատարել անվտանգային ոլորտի պարտավորությունները Հայաստանի նկատմամբ։