1 րոպեի ընթերցում
Գերմանիայի մի շարք շրջաններում գրանցվել են ուժգին ամպրոպներ, որոնք ուղեկցվել են պտտահողմերով և փոթորկալից քամիներով։ Փոթորկի հարվածն ամենից ուժգին զգացվել է Ռայնլանդ-Պֆալցում և Հեսսենում։ Մեկ կին զոհվել է, ևս մի քանի մարդ վիրավորվել։ Այդ մասին տեղեկացնում է «Արմենպրես»-ը՝ վկայակոչելով Euronews-ը։
Արվայլերի շրջանի Վալդորֆ բնակավայրում 58-ամյա կինը փորձել է պատսպարվել անձրևից, սակայն նրա վրա ծառ է ընկել։ Կինը մահացու վնասվածքներ է ստացել։ Վալդորֆում ևս մի քանի հոգի վնասվածքներով տեղափոխվել են հիվանդանոց։
Վեստերվալդի շրջանում իշխանությունները նախապես զգուշացրել էին բնակիչներին փոթորկի հետևանքով ծառերի տապալման վտանգի մասին։ Փոթորկի հանդարտվելուց հետո Հյոր-Գրենցհաուզենում ավերածությունների տեսարան է բացվել՝ պոկված տանիքներ, վնասված տներ և քանդված կառույցներ։ Շատ բնակիչներ նշել են, որ նման բան նախկինում երբեք չեն տեսել։
Թեև Ռայնլանդ-Պֆալցի շատ հատվածներում փոթորիկը տևել է ընդամենը մի քանի րոպե, բայցևայնպես 30 բնակավայրերում էլեկտրամատակարարումը ժամանակավորապես ընդհատվել է։