Մեծ Բրիտանիայի վարչապետը հաղորդագրություններ է փոխանակել Թրամփի աշխատակազմի ղեկավարը ձևացող անձի հետ

Մեծ Բրիտանիայի վարչապետ Էնդի Բըրնհեմը հաղորդագրություններ է փոխանակել մի անձի հետ, որը ներկայացել է որպես ԱՄՆ նախագահ Դոնալդ Թրամփի աշխատակազմի ղեկավար Սյուզի Ուայլս։ «Արմենպրես»-ի փոխանցմամբ՝ այս մասին հաղորդել է POLITICO-ն՝ վկայակոչելով իրազեկ աղբյուրների։

Ըստ հրապարակման՝ աղբյուրները հայտնել են, որ Բըրնհեմը մի քանի հաղորդագրություն է փոխանակել տվյալ անձի հետ, որից հետո կասկածներ են առաջացել նրա ով լինելու հետ կապված։ Միևնույն ժամանակ հաղորդվել է, որ փոխանակված հաղորդագրությունները «մեծ կարևորություն չունեին»։

Երկու պաշտոնյայի խոսքով՝ Վաշինգտոնում Մեծ Բրիտանիայի դեսպանատունը այնքան մտահոգված է եղել միջադեպով, որ հարցը բարձրացրել է Սպիտակ տանը։ Մեծ Բրիտանիայի կառավարությունը մտավախություն է հայտնել, որ Ուայլսի հեռախոսը կոտրել են։

Իր հերթին, BBC-ն հիշեցնում է, որ 2025 թ. մայիսին ԱՄՆ Հետաքննությունների դաշնային բյուրոն հետաքննություն էր վարում Ուայլսի հեռախոսի՝ հաքերային հարձակման ենթարկվելու հետ կապված։ Այդ ժամանակ Ուայլսը հայտնել էր, որ իր հեռախոսը հաքերային հարձակման է ենթարկվել, և իր անունից ներկայացող անձը կամ անձինք հաղորդագրություններ են ուղարկել ամերիկացի տարբեր բարձրաստիճան պաշտոնյաների։

Նման միջադեպեր են գրանցվել նաև նախկինում։ 2024 թվականին Մեծ Բրիտանիայի արտգործնախարարությունը հաստատել էր, որ այն ժամանակ արտաքին գործերի նախարարի պաշտոնը զբաղեցնող Դեյվիդ Քեմերոնը խարդախության զոհ է դարձել, երբ իրեն զանգահարել է մի անձ, որը ներկայացել է որպես Ուկրաինայի նախկին նախագահ Պյոտր Պորոշենկո։

2025 թ. հուլիսին լրատվամիջոցները հայտնել են, որ անհայտ անձը, ներկայանալով որպես ԱՄՆ պետքարտուղար Մարկո Ռուբիո, գրել է մի քանի ամերիկացի պաշտոնյայի և այլ երկրների արտաքին գործերի նախարարների։