Թրամփը Պենտագոնին հրահանգել է կրճատել Հարավային Կորեայի հետ զորավարժությունների մասշտաբները

ԱՄՆ նախագահ Դոնալդ Թրամփը հանձնարարել է Պենտագոնին կրճատել Հարավային Կորեայի հետ համատեղ զորավարժությունների մասշտաբները։ «Արմենպրես»-ի փոխանցմամբ՝ Truth Social հարթակում գրառման մեջ Թրամփը դա պատճառաբանել է Հյուսիսային Կորեայի ղեկավար Կիմ Չեն Ընի հետ լավ հարաբերություններով, զորավարժությունների բարձր արժեքով, ինչպես նաև նրանով, որ Սեուլը հրաժարվել է մասնակցել Իրանի դեմ գործողություններին։

«Հյուսիսային Կորեայի առաջնորդ Կիմ Չեն Ընի հետ իմ շատ լավ հարաբերությունները հաշվի առնելով՝ ես գոհ չեմ այն ​​փաստից, որ Միացյալ Նահանգները վաղուց համաձայնել է մասնակցել Հարավային Կորեայի հետ համատեղ զորավարժություններին։ Այս զորավարժությունները ոչ միայն թանկ են, քանի որ դրանց ծախսերի մեծ մասը վճարում է Ամերիկայի Միացյալ Նահանգները (ինչպես միշտ), այլև բացարձակապես անտեղի և թշնամական ազդանշան են ուղարկում այն ​​երկրին, որը Դոնալդ Ջ. Թրամփի նախագահության ընթացքում եղել է ոչ սպառնալից և հարգալից։ Հետևաբար, նաև հաշվի առնելով այն փաստը, որ արդեն ուշ է չեղարկելու համար, ես հանձնարարել եմ պատերազմի նախարար Փիթ Հեգսեթին զգալիորեն կրճատել համատեղ զորավարժությունների մասշտաբները», - գրել է նա օգոստոսի 16-ին՝ զորավարժությունների մեկնարկից ժամեր առաջ։

Թրամփը հավելել է, որ վերջերս Հարավային Կորեայի նախագահին հարցրել է՝ արդյոք նրանք «կցանկանան միանալ մեզ Իրանի Իսլամական Հանրապետության ապամիջուկայնացման գործում», սակայն նա պատասխանել է. «Ոչ, շնորհակալություն»։

«Ուլչիի ազատության վահան» ամենամյա համատեղ զորավարժությունները մեկնարկել են օգոստոսի 17-ին և կտևեն մինչև օգոստոսի 27-ը։ Դրանց մասնակցում է  մոտ 18 000 հարավկորեացի զինծառայող։ Զորավարժությունների նպատակն է մեծացնել պատրաստությունը Հյուսիսային Կորեայի սպառնալիքների նկատմամբ։

Հարավային Կորեայի շտաբների պետերի միացյալ կոմիտեից Reuters-ին հայտնել են, որ զորավարժությունները սկսվել են ըստ նախատեսվածի, սակայն նրանք հրաժարվել են մեկնաբանել Թրամփի խոսքերը։

Օրերս Հյուսիսային Կորեան դատապարտել է Հարավային Կորեայի և ԱՄՆ-ի միջև նախատեսվող զորավարժությունները, ինչպես նաև դրանց նախաշեմին բալիստիկ հրթիռի արձակում է իրականացրել։