2 րոպեի ընթերցում
Հայաստանում տնտեսական ակտիվության ցուցանիշը 2026 թվականի հունվար-հունիսին նախորդ տարվա նույն ժամանակահատվածի համեմատ աճել է 7.9 տոկոսով։
Ինչպես տեղեկացնում է «Արմենպրես»-ը, այս մասին են վկայում ՀՀ վիճակագրական կոմիտեի հրապարակած մակրոտնտեսական ցուցանիշները։
Առաջին կիսամյակում շինարարության ծավալն աճել է 24.5 տոկոսով՝ կազմելով 282.2 մլրդ դրամ։ Արդյունաբերական արտադրանքի ծավալն ավելացել է 10.8 տոկոսով՝ հասնելով 1 տրլն 522.5 մլրդ դրամի, իսկ ծառայությունների ծավալը՝ առանց առևտրի, աճել է 11 տոկոսով և կազմել 2 տրլն 148.6 մլրդ դրամ։
Առևտրի շրջանառությունն աճել է 0.9 տոկոսով՝ կազմելով 3 տրլն 155.9 մլրդ դրամ։ Էլեկտրաէներգիայի արտադրությունն ավելացել է 10 տոկոսով՝ հասնելով 5 մլրդ 163.7 մլն կՎտժ-ի։
Միևնույն ժամանակ գյուղատնտեսության համախառն արտադրանքի ծավալը նվազել է 11.9 տոկոսով և կազմել 310.1 մլրդ դրամ։
Արտաքին առևտրաշրջանառությունը կազմել է 9 մլրդ 570.9 մլն դոլար՝ նվազելով 0.1 տոկոսով։ Արտահանումը նվազել է 6.7 տոկոսով՝ մինչև 3 մլրդ 431.3 մլն դոլար, իսկ ներմուծումն աճել է 4 տոկոսով՝ կազմելով 6 մլրդ 139.6 մլն դոլար։
Միջին ամսական անվանական աշխատավարձն աճել է 5.5 տոկոսով և կազմել 310 հազար 787 դրամ։ Սպառողական գների ինդեքսը 2026 թվականի հունվար-հունիսին կազմել է 4.6 տոկոս։