Իրանը և Օմանը շուտով համաձայնության կգան Հորմուզի նեղուցով տարանցման նոր երթուղու վերաբերյալ․ Press TV
2 րոպեի ընթերցում
Թեհրանը և Մասկատը շուտով համաձայնության կգան Հորմուզի նեղուցով նավերի անվտանգ տարանցման նոր երթուղու վերաբերյալ։ «Արմենպրես»-ի փոխանցմամբ՝ այս մասին հաղորդում է իրանական Press TV-ն՝ հղում անելով իրանցի բարձրաստիճան պաշտոնյայի, որի անունը չի նշվում։
Հեռուստաալիքը հաղորդում է, որ Թեհրանի և Մասկատի միջև Հորմուզի նեղուցի շուրջ բանակցությունները մտել են «նոր փուլ», որտեղ «երկկողմանի փոխըմբռնումը հասանելի է»։
Բանակցությունների «նպատակն է Հորմուզի նեղուցով միջին միջանցք ստեղծել՝ անվտանգ նավարկություն ապահովելու և Իրանի՝ որպես ափամերձ պետության իրավունքները պաշտպանելու համար»։
Պաշտոնյայի խոսքով՝ գործարկվելուց հետո նոր միջանցքը կփոխարինի ինչպես հյուսիսային, այնպես էլ հարավային առկա երթուղիներին։
Նեղուցը, որն ընդամենը 34 կմ լայնությամբ միջազգային նավագնացության երթուղի է, փակվել է Իրանի կողմից՝ ի պատասխան ԱՄՆ-ի և Իսրայելի հարձակումների։ Al Jazeera-ն հիշեցնում է, որ պատերազմից առաջ նավերը հետևում էին ՄԱԿ-ի կողմից ընդունված երկկողմանի երթևեկության բաժանման սխեմային, որտեղ նավարկության միջանցքներն անցնում էին ինչպես Իրանի, այնպես էլ Օմանի ջրերով։
Պատերազմի սկսվելուց հետո Իրանը հրահանգել էր նեղուցով անցնող բոլոր նավերին նավարկել նոր երթուղով՝ իրանական Լարակ կղզու մոտով կամ, այսպես կոչված, հյուսիսային երթուղով։ Հունիսին Թեհրանի և Վաշինգտոնի միջև հրադադարի համաձայնագրի ստորագրումից հետո ԱՄՆ-ն պնդել էր, որ նավերն անցնեն Օմանի ափերի մոտով՝ այլընտրանքային երթուղով, որը հայտնի է որպես հարավային երթուղի։ Սակայն Իրանը դեմ էր արտահայտվել այդ քայլին և նոր հարձակումներ սկսել նավերի վրա՝ նշելով, որ դա խախտում է հրադադարի համաձայնությունը։
Իր հերթին, ավելի վաղ Իրանի արտաքին գործերի նախարարության խոսնակ Էսմայիլ Բաղային հայտարարել էր, որ Իրանի և Օմանի միջև ընթացող բանակցությունները «դրական» են եղել թե՛ տեխնիկական, թե՛ քաղաքական մակարդակներում և կենտրոնացած են Հորմուզի նեղուցով անցման համար անվտանգ երթուղիներ սահմանելու վրա։