Մոլդովայի կառավարությունը վավերացրել է Ուկրաինայի հետ  ռազմատեխնիկական համագործակցության մասին համաձայնագիրը. Moldpres

Հոդվածը հրապարակվում է «Արմենպրես»-ի և Moldpres-ի միջև ստորագրված համաձայնագրի շրջանակում։

Մոլդովայի նախարարների կաբինետի անդամները նոյեմբերի 12-ին հավանություն են տվել Մոլդովայի Հանրապետության և Ուկրաինայի կառավարությունների միջև ռազմատեխնիկական համագործակցության մասին համաձայնագրի վավերացմանը։ «Արմենպրես»-ի փոխանցմամբ՝ այս մասին հաղորդում է Moldpres գործակալությունը։

Փաստաթուղթը նախատեսում է փորձի և գիտելիքների, տեխնիկական և գիտական ​​տեղեկատվության փոխանակում, ինչպես նաև գիտելիքների և տեխնոլոգիաների փոխանցում համատեղ հետաքրքրություն ներկայացնող մի շարք ոլորտներում, այդ թվում՝ ռազմական տեխնիկայի արդիականացման և անվտանգ շահագործման, լոգիստիկայի, կարևորագույն ենթակառուցվածքների պաշտպանության, կիբերպաշտպանության հնարավորությունների զարգացման և օդային տարածքի հսկողության ասպարեզներում։

Պաշտպանության նախարար Անատոլի Նոսատիյն ընդգծել է, որ փաստաթղթի իրականացման շրջանակներում ձեռնարկվող գործողությունները չեն կարող մեկնաբանվել որպես ուղղակի ռազմական օգնության տրամադրում զինված հակամարտության մեջ ներգրավված պետությանը։

«Ստորագրված համաձայնագիրը նպատակ ունի զարգացնել կողմերի միջև բարեկամական հարաբերություններ՝ կենտրոնանալով պաշտպանական կարողությունների ամրապնդման և համագործակցության վրա փոխադարձ հետաքրքրություն ներկայացնող հարցերում։ Համագործակցությունը բացառապես խորհրդատվական բնույթ է կրում և ներառում է տեխնիկական և գիտական ​​տեղեկատվության, մասնագիտական փաստաթղթերի, լավագույն փորձի և մասնագիտական ​​փորձի վերլուծություն և փոխանակում», - նշել է նա։

Այս համատեքստում վարչապետ Վասիլե Տոֆանը շեշտել է, որ Մոլդովայի և Ուկրաինայի միջև ռազմատեխնիկական համագործակցության մասին համաձայնագիրը չի ազդում երկրի չեզոքության վրա և անվտանգային ռիսկեր չի պարունակում, այլ նպաստում է պաշտպանական կարողությունների ամրապնդմանը։

Ուկրաինայի հետ համագործակցության շրջանակ ստեղծվել է 1993 թվականին հաստատված հիմնական համաձայնագրի միջոցով, որը հետագայում մանրամասնորեն լրացվել է լրացուցիչ երկկողմ համաձայնագրերով այնպիսի ոլորտներում, ինչպիսիք են օդային պաշտպանությունը, ավիացիան, ռազմական բժշկությունը, ռազմական տրանսպորտը և զորքերի լոգիստիկ աջակցությունը: Ուստի, ըստ հրապարակման, ներկայիս համաձայնագիրը լրացնում է երկու երկրների միջև համագործակցության գործող իրավական շրջանակը:

Մոլդովայի և Ուկրաինայի կառավարությունների միջև ռազմատեխնիկական համագործակցության մասին համաձայնագիրը ստորագրվել է ընթացիկ տարվա հոկտեմբերի 26-ին՝ վարչապետ Վասիլե Տոֆանի՝ Կիև կատարած այցի ընթացքում։