Վաշինգտոնում տեղի ունեցած հրաձգության հետևանքով առնվազն չորս մարդ է վիրավորվել

Վաշինգտոնի Լոգան Սըրքլ թաղամասում, Սպիտակ տնից մոտ 1,5 կիլոմետր հեռավորության վրա, տեղի ունեցած հրաձգության հետևանքով վիրավորվել է առնվազն չորս մարդ։ Այդ մասին տեղեկացնում է «Արմենպրես»-ը՝ վկայակոչելով BBC-ին։

Դեպքի վայր է ուղարկվել մայրաքաղաքային ոստիկանության վարչության արագ արձագանքման խումբը։ Տեղում գտնվող թղթակիցների հաղորդմամբ՝ տարածքը շրջափակված է տասնյակ ոստիկանական մեքենաներով։

Լոգան Սըրքլը Վաշինգտոնի սրտում գտնվող աշխույժ թաղամաս է, որը հայտնի է թե՛ տեղացիների, թե՛ զբոսաշրջիկների շրջանում։ Ոստիկանական ուղղաթիռները երկնքում պտտվում են դեպքի վայրի վերևում։ Տուժածների ինքնության կամ նրանց վիճակի վերաբերյալ դեռևս տեղեկություններ չկան։

Ըստ վերջին տեղեկությունների՝ «Vida Fitness» կենտրոնում հրաձիգը կրակ է բացել՝ վիրավորելով չորս մարդու։ Այնուհետև նա դուրս է եկել և շարունակել անկանոն կրակել՝ այդ թվում նաև բազմահարկ ավտոկայանատեղիի ուղղությամբ։ Տեղեկատվության համաձայն՝ կասկածյալը, որը նկարագրվում է որպես խոշոր կազմվածքով սպիտակամորթ տղամարդ, փակվել է շենքերից մեկի ներսում։