2 րոպեի ընթերցում
Հայաստանում 2026 թվականի երկրորդ եռամսյակում 12-ամսյա գնաճը շարունակում է ձևավորվել թիրախից բարձր մակարդակում՝ հունիսին կազմելով 5.1 տոկոս. 12-ամսյա բնականոն գնաճը եղել է 4.9 տոկոս։
«Արմենպրես»-ի հաղորդմամբ՝ այս մասին օգոստոսի 4-ին կայացած մամուլի ասուլիսի ժամանակ հայտարարեց ՀՀ կենտրոնական բանկի նախագահի տեղակալ Հովհաննես Խաչատրյանը։
«Աշխարհաքաղաքական անորոշության, էներգակիրների բարձր գների և համաշխարհային տնտեսության դանդաղման պայմաններում պահպանվում են գնաճային ռիսկերը»,-ասաց Խաչատրյանը՝ հավելելով, որ առաջատար երկրների կենտրոնական բանկերի կողմից բարձր տոկոսադրույքների երկար պահպանման կամ դրանց հետագա բարձրացման հավանականությունն աճել է։
«Հայաստանում 2026 թվականի երկրորդ եռամսյակում պահպանվել է բարձր տնտեսական ակտիվությունը՝ պայմանավորված հիմնականում շինարարության և ծառայությունների ոլորտների զարգացմամբ։ Միաժամանակ, արտահանման առանձին շուկաներում առկա խնդիրների հետևանքով տնտեսությունում աճել են եկամուտների նվազման և որոշ ապրանքների շուկայում ավելցուկային առաջարկի ձևավորման ռիսկերը, որոնք կարող են ունենալ գնանկումային ազդեցություն»,-նշեց նա։
Հիշեցնենք, որ ՀՀ կենտրոնական բանկի խորհուրդը օգոստոսի 4-ի նիստում որոշել էր անփոփոխ թողնել վերաֆինանսավորման տոկոսադրույքը՝ այն պահպանելով 6.50 տոկոսի մակարդակում։
ԿԲ նախագահի տեղակալը հավելեց, որ ԿԲ խորհուրդը կշարունակի մշտադիտարկել տնտեսության զարգացման սցենարները և պատրաստ է ձեռնարկել համարժեք գործողություններ միջնաժամկետ հորիզոնում գնաճի 3 տոկոս նպատակի և գների կայունության ապահովման համար։