2 րոպեի ընթերցում
Եմենի հութիների ռազմական խոսնակը հուլիսի 20-ին հեռուստաուղերձում հայտարարել է Սաուդյան Արաբիայի դեմ ծովային շրջափակում սկսելու մասին, որն ուժի մեջ է մտնում անմիջապես։ «Արմենպրես»-ի փոխանցմամբ՝ այս մասին հաղորդում է Reuters գործակալությունը:
Զինված խմբավորումը հայտարարել է «հանցագործ սաուդյան թշնամու դեմ ծովային էմբարգո սահմանելու մասին՝ հիմնված «ակն ընդ ական» հավասարման վրա, որն ուժի մեջ է մտնում այս հայտարարության հրապարակումից անմիջապես հետո»։
Հութիները հայտարարել են, որ շրջափակումը պատասխանն է Սաուդյան Արաբիայի կողմից Եմենի ժողովրդի նկատմամբ գրեթե 12 տարի շարունակվող «անարդար և ճնշող պաշարման, որի ընթացքում թալանվել են մեր ռեսուրսները, և համապարփակ շրջափակում է սահմանվել մեր նավահանգիստների և օդանավակայանների նկատմամբ ցամաքային, ծովային ու օդային ճանապարհներով»։
Հութիներն անցյալ շաբաթ հրթիռներ են արձակել Սաուդյան Արաբիայի վրա՝ մեղադրելով թագավորությանը իրենց վերահսկողության տակ գտնվող Սանայի օդանավակայանը ռմբակոծելու համար: Այսպիսով, խախտվել է թագավորության և շարժման միջև հակամարտությունից հետո ձեռք բերված չորս տարվա հրադադարը։
Եմենն ավելի քան մեկ տասնամյակ բախվում է քաղաքացիական պատերազմի. Իրանի աջակցությունը վայելող հութիները գրավել են մայրաքաղաքը և ստիպել միջազգայնորեն ճանաչված կառավարությանը տեղափոխվել հարավ։ Ադենի հարավային նավահանգստից գործող կառավարությունը վայելում է Սաուդյան Արաբիայի և Պարսից ծոցի այլ պետությունների աջակցությունը։