Բնագիտական, տեխնոլոգիական, ճարտարագիտական և մաթեմատիկական առարկաներ դասավանդող 1129 մանկավարժ լրավճար կստանա
3 րոպեի ընթերցում
Հայաստանի կառավարությունն առաջարկում է ընդլայնել բնագիտական, թվային և հաղորդակցական տեխնոլոգիաների ուղղությամբ առարկաներ դասավանդող և լրավճար ստացող մանկավարժական աշխատողների շրջանակը՝ դրանում ներառելով նաև լաբորանտներին, գրադարանավարներին, էլեկտրոնային կառավարման և դասավանդման ապահովման մասնագետներին ու այլ աշխատակիցների։
«Արմենպրես»-ի հաղորդմամբ՝ համապատասխան չզեկուցվող նախագիծն ընդգրկված է Կառավարության հուլիսի 16-ի նիստի օրակարգում։
Գործող կարգավորմամբ միևնույն հանրակրթական ուսումնական հաստատությունում ուսուցիչ չհամարվող մանկավարժական, այդ թվում՝ վարչական աշխատողներին իրենց իրականացրած դասաժամերի համար լրավճար չի տրամադրվում։
Նախագծով առաջարկվում է տարանջատել վարչական և մյուս մանկավարժական աշխատողներին՝ սահմանելով, որ լրավճար չի տրամադրվի միայն նույն հաստատությունում դասավանդող վարչական աշխատողներին։
Այդ շրջանակում ներառվում են տնօրենը, տնօրենի տեղակալները, սովորողների հետ դաստիարակչական աշխատանքների կազմակերպիչը, կրթական աջակցությունների և դաստիարակչական աշխատանքների համակարգողը և վարչատնտեսական աշխատողները։
Փոփոխության արդյունքում լրավճար ստանալու հնարավորություն կունենան այն մանկավարժական աշխատողները, որոնք իրենց հիմնական հաստիքին զուգահեռ դասավանդում են ԲՏՃՄ ուղղությամբ առարկաներ և բավարարում են ուսուցչի որակավորման պահանջներին։
Կրթության կառավարման տեղեկատվական համակարգի տվյալներով՝ նախագծի ընդունման դեպքում շահառուների թիվը կավելանա 1129-ով։ Նրանցից 694-ը լաբորանտներ են, 269-ը՝ էլեկտրոնային կառավարման և դասավանդման ապահովման մասնագետներ, 73-ը՝ գրադարանավարներ, 80-ը՝ դաստիարակներ, դասղեկներ, զինղեկներ, խմբակավարներ և այլ աշխատողներ, իսկ 13-ը՝ հոգեբաններ, հատուկ և սոցիալական մանկավարժներ։
Նոր շահառուներին տրամադրվող լրավճարի տարեկան ընդհանուր գումարը նախնական գնահատմամբ կկազմի 278,6 միլիոն դրամ։
2026 թվականի պետական բյուջեով ծրագրի համար նախատեսված է 2 միլիարդ 138,7 միլիոն դրամ՝ 8881 շահառուի հաշվարկով։ Ներկայում լրավճար է ստանում 8300 անձ, որոնց վճարումների ընդհանուր գումարը կազմում է 1 միլիարդ 902,8 միլիոն դրամ։
Նախագծի հիմնավորման համաձայն՝ փոփոխությունից հետո բյուջեով հաշվարկված շահառուների թիվը կավելանա 548-ով՝ հասնելով 9429-ի, ինչի համար տարեկան լրացուցիչ կպահանջվի 42,6 միլիոն դրամ։
Նախագծով առաջարկվում է նաև լրավճար ստանալու հիմքում դնել ոչ թե առարկաների ֆիքսված անվանումները, այլ դրանց՝ բնագիտական և տեղեկատվական ու հաղորդակցական տեխնոլոգիաների ոլորտներին պատկանելությունը։ Սա հնարավորություն կտա պահպանել կարգավորման կիրառելիությունը նաև առարկաների անվանումների փոփոխության կամ նոր ծրագրերի ներդրման դեպքում։