Մեծ Բրիտանիան ԻՀՊԿ-ն կդասակարգի որպես ազգային անվտանգության համար սպառնալիք. ներքին գործերի նախարար

Մեծ Բրիտանիայի ներքին գործերի նախարար Շաբանա Մահմուդը հայտարարել է, որ Իրանի Իսլամական հեղափոխության պահապանների կորպուսը (ԻՀՊԿ) կդասակարգվի որպես ազգային անվտանգության սպառնալիք։ «Արմենպրես»-ի փոխանցմամբ՝ այս մասին հաղորդում է BBC-ն:

Խորհրդարանին ուղղված գրավոր հայտարարության մեջ նախարարը նշել է, որ ԻՀՊԿ-ին աջակցությունը՝ դրական կարծիք հայտնելուց մինչև նրանց օգնելը, այժմ կհամարվի հանցագործություն, որի համար պատիժը կլինի մինչև 14 տարվա ազատազրկում։

Արգելքի տակ են հայտնվում նաև երկու այլ խմբավորումներ՝ «Աջերի հետևորդների իսլամական շարժումը» և Ռուսաստանի գլխավոր հետախուզական վարչության կամավորական կորպուսը։

«Իրանը և Ռուսաստանն օգտագործում են իրենց պրոքսիներին և ավազակների՝ մեզ մոտ իրենց կեղտոտ գործն անելու համար: Ես դասակարգման մեջ արագ ներառել եմ երեք խումբ, որպեսզի նրանց համար աշխատողները հայտնաբերվեն և բանտարկվեն», - ասել է նախարար Մահմուդը։

Ոստիկանությանը և հետախուզական գործակալություններին կտրվեն նոր լիազորություններ՝ այս խմբերի կողմից լրտեսության, արտաքին միջամտության, դիվերսիայի և ֆիզիկական հարձակումների դեմ պայքարելու համար։

BBC-ն նշում է, որ ԻՀՊԿ-ն, ենթադրաբար, ղեկավարել է յոթ հարձակում Մեծ Բրիտանիայի հրեական համայնքների հետ կապված վայրերի վրա:

Մեծ Բրիտանիայի վարչապետ Քիր Սթարմերն ավելի վաղ հայտնել էր, որ իրավապահներին տրվող նոր լիազորություններն ավելի կհեշտացնեն Բրիտանիայում հարձակումներ կատարողներին պատասխանատվության ենթարկելու գործընթացը:

Եթե խորհրդարանն առաջիկա օրերին հաստատի այս նախաձեռնությունը, ապա նշված խմբերի անունից դիվերսիաներ կատարողները կարող են դատապարտվել ցմահ ազատազրկման։

Այս փոփոխությունը նշանակում է, որ դատախազներն այլևս կարիք չեն ունենա յուրաքանչյուր դեպքի համար կապ հաստատել օտարերկրյա իշխանությունների հետ, ինչը կհեշտացնի գործերի հարուցումը։