Երանոսում բարերարի միջոցներով նորոգվել է 12 կմ երկարության դաշտամիջյան ճանապարահ

Գեղարքունիքի մարզի Մարտունի համայնքի Երանոս գյուղում բարերար Հրաչյա Խանսանամյանի միջոցներով նորոգվել է 12 կիլոմետր երկարության ճանապարհ, որը նպաստելու է թե՛ գյուղատնտեսական աշխատանքների իրականացմանը, թե զբոսաշրջային այցերի կազմակերպմանը Սուրբ Հովհաննես մատուռ ու գյուղի այլ հուշարձաններ և տեսարժան վայրեր։

Ինչպես «Արմենպրես»-ին տեղեկացրեց Երանոսի վարչական ղեկավար Սաշա Բավեյանը, նման մեծածավալ աշխատանքների իրականացման նպատակով բարերարը վարձակալել է 10 միավոր տեխնիկա, որոնց գործադրմամբ շուրջ մեկուկես ամիս ընթացել են դաշտամիջյան ճանապարհների նորոգման, հարթեցման ու լայնացման աշխատանքները։

«Նորոգված ճանապարհներից 1-ը՝ մոտ 2 կիլոմետր երկարությամբ, տանում է դեպի Սուրբ Հովհաննես մատուռ ու Արցախյան պատերազմներում զոհված հայորդիների հիշատակին նվիրված Խաչ-հուշարձան։ Այս սրբավայրը և՛ շատ հայտնի ուխտատեղի է, և՛ զբոսաշրջային վայր, ուր այցելուների հոսք է նկատվում գրեթե տարվա բոլոր եղանակներին։ Այսուհետ սրբավայր բերող ճանապարհն արդեն անցանելի է մարդատար ավտոմեքենաների համար։

Նորոգված ճանապարհներից երկրորդը՝ մոտ 10 կիլոմետր երկարությամբ, տանում է դեպի Երանոսի հանդամաս, ուր գտնվում են գյուղի արոտավայրերն ու խոտհարքերը։ Այս առումով սա անգնահատելի օգնություն է անասնապահությամբ զբաղված մարդկանց, որոնք արդեն կօգտվեն միանգամայն նորոգված ու անցանելի ճանապարհներից։ Հավելեմ, որ դաշտամիջյան այդ ճանապարհները գտնվում էին խիստ անբարեկարգ, գրեթե անանցանելի վիճակում։ Հրաչյա Խանսանամյանը տարբեր տարիների ընթացքում ևս գյուղում իրականացրել է բարեգործական տարբեր ձեռնարկներ, որոնք թեթևացրել են մարդկանց հոգսերը»,-ներկայացրեց Սաշա Բավեյանը։