2 րոպեի ընթերցում
Վենեսուելայում հունիսի 24-ին տեղի ունեցած 7,2 և 7,5 մագնիտուդով հզոր երկրաշարժերի զոհերի թիվը վերջին մեկ օրում ավելացել է ևս 300-ով՝ հասնելով 2595-ի, հայտարարել է երկրի նախագահի պաշտոնակատար Դելսի Ռոդրիգեսը։ «Արմենպրես»-ի փոխանցմամբ՝ այս մասին հաղորդում է CNBC-ն։
Եվս 12 000 մարդ վիրավորվել է։ Ռոդրիգեսը չի նշել անհետ կորածների թիվը։ Ըստ համացանցում լայն տարածում գտած ոչ պաշտոնական ցուցակի՝ անհետ կորած է 38 500 մարդ։ Որոնողափրկարարական գործողությունները շարունակվում են։ Երկրաշարժի 8-րդ օրը փլատակներից հաջողվել էր դուրս բերել 43-ամյա մի տղամարդու։
Երկրաշարժից ամենաշատը տուժել է մայրաքաղաքից ոչ հեռու գտնվող Լա Գուայրայի նահանգը։ Ռոդրիգեսը հայտնել է, որ Լա Գուայրայի գրեթե բոլոր պաշտոնյաները զոհվել են ստորգետնյա ցնցումների ժամանակ։
Ըստ Վենեսուելայի իշխանությունների՝ փլուզվել է գրեթե 800 շենք, որոնցից 189 լիովին ավերվել են։
Իշխանությունները մերժել են քննադատությունները, որ չափազանց դանդաղ են արձագանքել աղետին։
ՄԱԿ-ի զարգացման ծրագրի հաշվարկներով՝ երկրաշարժերի ուղղակի ֆիզիկական վնասը կարող է կազմել 6,7 միլիարդ դոլար։
Երկրաշարժից հետո Վենեսուելային օգնություն են ուղարկել բազմաթիվ երկրներ, այդ թվում՝ Բրազիլը, Մեքսիկան, Կանադան, Կուբան, եվրոպական երկրները։ ԱՄՆ-ն մարդասիրական օգնությունը հնարավոր դարձնելու համար չեղարկել է երկրի դեմ գործող որոշ պատժամիջոցներ, 150 միլիոն դոլարի հումանիտար օգնություն է խոստացել, ինչպես նաև այնտեղ ուղարկել ավելի քան 900 փրկարարի։