Վենեսուելայում երկրաշարժից մեկ շաբաթ անց մարդիկ շարունակում են մնալ փլատակների տակ. CBS

Փրկարարները Վենեսուելայում տեղի ունեցած երկրաշարժից արդեն մեկ շաբաթ անց շարունակում են փլատակների տակ ողջ մնացած մարդկանց գտնել: Ինչպես հաղորդում է «Արմենպրես»-ը, այս մասին ԱՄՆ CBS News հեռուստաալիքին հայտնել են Միացյալ Նահանգներից ժամանած փրկարարական խմբերի ներկայացուցիչները, որոնք աշխատում են Կարակասի շրջանում:

Մասնավորապես, փրկարարներն արդեն վեց օր է՝ փորձում են դուրս հանել 44-ամյա Էրման Ժիլ Ֆլորեսին, որը երկրաշարժի պահին գտնվել է փլուզված 10-հարկանի շենքի ստորգետնյա կայանատեղիում: Նա այնտեղ աշխատում էր որպես անվտանգության աշխատակից և մինչև հիմա մնում է իր խցիկում: Տղամարդը չի վիրավորվել, նրան կարողացել են ջուր փոխանցել, բայց փլավածքների մաքրումը շատ դանդաղ է ընթանում, կա սալերի փլուզման վտանգ:

CBS-ը, հղում անելով տեղական իշխանությունների տվյալներին, հավելել է, որ փլատակների տակից դուրս է բերվել մոտ 6,5  հազար մարդ, ևս դեռ 51 հազարը մինչ օրս համարվում է անհետ կորած:

Վենեսուելայում երկրաշարժը տեղի է ունեցել հունիսի 24-ի երեկոյան: Մոտ 40 վայրկյան տարբերությամբ գրանցվել են երկու ստորգետնյա ցնցում՝ 7,2 և 7,5 մագնիտուդով: Դրանց էպիկենտրոնները գտնվել են միմյանցից 10 կիլոմետր հեռավորության վրա՝ Վենեսուելայի Յարակույի նահանգում: Վերջին պաշտոնական տվյալների համաձայն՝ զոհվել է 1 943 մարդ, վիրավորվել է 10 571-ը, իսկ 28 380 տուժած բժշկական օգնություն է ստանում հիվանդանոցներում և դաշտային ճամբարներում: