1 րոպեի ընթերցում
Գեղարքունիքի մարզի Մարտունի համայնքի Երանոս գյուղում ՀՀ կառավարության կողմից իրականացվող սուբվենցիոն ծրագրերի շրջանակներում ընթանում են 1-ին և 4-րդ փողոցների հիմնանորոգման աշխատանքներ։
Ինչպես «Արմենպրես»-ին տեղեկացրին Մարտունիի համայնքապետարանից, Երանոսի փողոցների հիմնանորոգման ծրագրի պայմանագրային արժեքը կազմում է 145 միլիոն 589 հազար դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Մարտունիի համայնքապետարանը։
Ծրագրով նախատեսված է Երանոսի 1-ին և 4-րդ փողոցների ասֆալտապատում՝ 2 կիլոմետր երկարությամբ և շուրջ 12 հազար քմ մակերեսով։
Հունիսի 15-ից մեկնարկած շինարարական աշխատանքներն արդեն իրականացվել են շուրջ 60 տոկոսով։
Հիմնանորոգման ծրագիրն իրականացնում է «ՎՄՎ ՔՈՄՓՆԻ» ընկերությունը։
Ծրագրի իրականացման արդյունքում Երանոսի 1-ին և 4-րդ փողոցների բնակիչներն առաջին անգամ ասֆալտապատ ու բարեկարգ ճանապարհից օգտվելու հնարավորություն կունենան։
Շինարարական աշխատանքները կավարտվեն հուլիսին։