ՍԴ-ում շարունակվել է ԱԺ ընտրությունների արդյունքների վերաբերյալ յոթ քաղաքական ուժերի դիմումների քննությունը

Սահմանադրական դատարանում հունիսի 27-ին շարունակվել է խորհրդարանական ընտրությունների արդյունքները վիճարկելու վերաբերյալ յոթ քաղաքական ուժերի դիմումների քննությունը։ 

«Արմենպրես»-ի հաղորդմամբ՝ դատական նիստը մեկնարկել է ԲՀԿ-ի դիմումի ներկայացմամբ։

Առաջին դատական նիստին իրենց դիմումները ներկայացրել են «Ուժեղ Հայաստան» և «Հայաստան» դաշինքներն ու «Միասնության թևեր», «Դեմոկրատիա Օրենք Կարգապահություն», «Հանուն Հանրապետության», «Նոր ուժ» կուսակցությունները:

Նրանք բարձր դատարանից պահանջում են անվավեր ճանաչել հունիսի 7-ի ՀՀ ԱԺ հերթական ընտրությունների արդյունքները:

«Քաղաքացիական պայմանագիրն» այս գործով ներգրավված է որպես երրորդ կողմ:

Մինչ մեկնարկը, ՍԴ նախագահ Արման Դիլանյանը հայտարարել է, որ «Նոր ուժ» կուսակցության կողմից ստացվել է գրավոր դիմումը՝ դատաքննությանը չմասնակցելու վերաբերյալ։

Այնուհետև նիստը մեկնարկել է «Բարգավաճ Հայաստան» կուսակցության դիմումի ներկայացմամբ:

«Միասնության թևեր» կուսակցության ներկայացուցիչը դիմում է ներկայացրել ՍԴ-ում վարույթը կասեցնելու վերաբերյալ, պայմանավորված վարչական դատարանում ԿԸՀ-ի որոշման դեմ բողոքի քննությամբ: Սահմանադրական դատարանը միաձայն որոշում է ընդունել մերժել դիմումը:

Դատական նիստին, որպես պատասխանող կողմ, հանդես է եկել Կենտրոնական ընտրական հանձնաժողովը։

ԿԸՀ նախագահ Վահագն Հովակիմյանը հայտարարել է, որ հանձնաժողովը մերժում է ներկայացրած բոլոր 7 դիմումներն ամբողջությամբ։

«ԿԸՀ-ն գտնում է, որ վիճարկվող որոշումն իրավաչափ է, կայացել է ՀՀ ընտրական օրենսգրքի պահանջների պահպանմամբ, ուստի խնդրում ենք դիմումները մերժել»,- հայտարարել է Հովակիմյանը։

Նիստին հարակից պատասխաններով են հանդես եկել դատախազության, ներքին գործերի նախարարության և հակակոռուպցիոն կոմիտեի ներկայացուցիչները:

Սահմանադրական դատարանը հունիսի 26-ին սկսել է հունիսի 7-ին Հայաստանում կայացած խորհրդարանական ընտրությունների արդյունքները վիճարկելու գործի քննությունը։

Ընտրությունների արդյունքները վիճարկելու հարցով Սահմանադրական դատարան են դիմել «Ուժեղ Հայաստան» կուսակցությունների դաշինքը, «Միասնության թևեր» կուսակցությունը, «Դեմոկրատիա Օրենք Կարգապահություն» կուսակցությունը, «Բարգավաճ Հայաստան» կուսակցությունը, «Հանուն Հանրապետության» կուսակցությունը, «Հայաստան» կուսակցությունների դաշինքը և «Նոր ուժ» ռեֆորմիստական կուսակցությունը։ 

Գործով Սահմանադրական դատարանի որոշման հրապարակման վերջնաժամկետը հուլիսի 4-ն է։

Հունիսի 7-ին կայացած խորհրդարանական ընտրությունների արդյունքներով Ազգային ժողով են անցել «Քաղաքացիական պայմանագիր» կուսակցությունը, «Ուժեղ Հայաստան» կուսակցությունների դաշինքը և «Հայաստան» կուսակցությունների դաշինքը։   

ԿԸՀ ամփոփած արդյունքներով՝ «Քաղաքացիական պայմանագիրը» նոր խորհրդարանում կունենա 64 մանդատ, «Ուժեղ Հայաստան» դաշինքը՝ 29 մանդատ, իսկ «Հայաստան» դաշինքը՝ 12 մանդատ։