Թուրքիան աջակցում է Նեթանյահուին և նրա շրջապատին պատասխանատվության ենթարկելու միջազգային ջանքերին. Նուման Քուրթուլմուշ
2 րոպեի ընթերցում
Թուրքիայի ազգային մեծ ժողովի նախագահ Նուման Քուրթուլմուշը հայտարարել է, որ Անկարան շարունակելու է աջակցել Իսրայելի վարչապետ Բենիամին Նեթանյահուի և նրա շրջապատի պատասխանատվության ենթարկմանն ուղղված միջազգային ջանքերին։
Ինչպես հաղորդում է «Արմենպրես»-ը, թուրքական «Անադոլու» լրատվական գործակալության փոխանցմամբ՝ Քուրթուլմուշն այդ մասին ասել է Բաքվում կայացած Իսլամական համագործակցության կազմակերպության անդամ պետությունների խորհրդարանական միության 20-րդ նստաշրջանում։
«Թուրքիան մոբիլիզացնում է իր բոլոր հնարավորությունները, այդ թվում՝ միջազգային դատական ատյանների միջոցով, Նեթանյահուին և նրա շրջապատին պատասխանատվության ենթարկելու համար՝ կատարված հանցագործությունների կապակցությամբ»,- հայտարարել է Թուրքիայի խորհրդարանի նախագահը։
Քուրթուլմուշը նաև քննադատել է Իսրայելի քաղաքականությունը տարածաշրջանում՝ նշելով, որ «Պաղեստինը պատկանում է պաղեստինցիներին, Լիբանանը՝ լիբանանցիներին, Սիրիան՝ սիրիացիներին, իսկ Իրանը՝ իրանցիներին»։
Նրա խոսքով՝ Լիբանանի դեմ Իսրայելի գործողությունների դադարեցումը կարևոր նշանակություն ունի տարածաշրջանային կայունության և ընթացող դիվանագիտական գործընթացների համար։
Թուրքիայի խորհրդարանի նախագահը ելույթում անդրադարձել է նաև պաղեստինյան հարցին՝ Իսրայելի գործողությունները որակելով որպես միջազգային իրավունքի և մարդասիրական նորմերի խախտում։