1 րոպեի ընթերցում
ԱՄՆ փոխնախագահ Ջեյ Դի Վենսը Շվեյցարիայում կայացած մամուլի ասուլիսում հայտարարել է, որ Իրանի ակտիվների ապասառեցումը հնարավոր է, բայց այդ միջոցները պետք է օգտագործվեն ոչ թե իրանամետ խմբավորումներին ֆինանսավորելու, այլ, օրինակ, ամերիկյան արտադրանք գնելու համար։ «Արմենպրես»-ի փոխանցմամբ՝ մամուլի ասուլիսի տեսանյութը տարածել է The Sun պարբերականը։
«Մենք ցանկանում ենք վստահ լինել, որ կգործարկենք մի գործընթաց, որի դեպքում, եթե մենք երբևէ ապասառեցնենք իրանական միջոցները, ապա կկարողանանք երաշխավորել, որ այդ գումարը կօգտագործվի Իրանի ժողովրդին օգնելու, այլ ոչ թե ահաբեկչությունը ֆինանսավորելու համար», - ասել է նա։
Դրա հետ մեկտեղ Վենսը նշել է, որ ԱՄՆ նախագահի բանագնաց և փեսա Ջարեդ Քուշները Կատարի հետ քննարկել է մի առաջարկ, որի համաձայն միջոցների հնարավոր ապասառեցումը պետք է արժանանա Վաշինգտոնի և Դոհայի հավանությանը, և այդ միջոցները կարող են օգտագործվել ամերիկացի արտադրողներից սոյա, ցորեն, եգիպտացորեն և այլ գյուղատնտեսական արտադրանք գնելու համար, որից օգուտ կստանա իրանցի ժողովուրդը։